हॉटेलसाठी लागणारे साहित्य ऑनलाईन पद्धतीने मागवणाऱ्या व्यावसायिकास सुमारे २ लाख ७० हजार ७३ रूपयांचा गंडा घातल्याचा प्रकार घडला आहे. याप्रकरणी सांगली येथील एका व्यावसायिकाविरूद्ध येथील पोलीस स्थानकात फसवणूकीचा गुन्हा दाखल झाला आहे. याबाबत पोलिसांनी पत्रकारांना दिलेल्या अधिक़ माहितीनुसार, येथील हॉटेल व्यावसायिक सुनिल जनार्दन बक्षी (वय ६७, रा. तुलसी अपार्टमेट, प्रभातरोड मार्कडी चिपळूण) यांनी याबाबतची फिर्याद दिली आहे. बक्षी यांनी २ डिसेंबर ते १३ डिसेंबर या कालावधीत हॉटेलसाठी लागणारे विविध प्रकारच्या साहित्याची मागणी केली होती.
त्यासाठी त्यांनी एका अॅपद्वारे सांगली येथील ट्रेडर्सकडे ऑनलाईन पद्धतीने पैसे भरून साहित्याची मागणी केली. त्यासाठी टप्या-टप्प्याने २ लाख ७० हजार ७३ रूपये त्यांच्या खात्यात जमा केले. परंतू अनेक दिवस उलटूनही संबंधित ट्रेडर्सकडून कोणत्याही प्रकारचा माल किंवा रक्कम परत केलेली नाही. याबाबत तक्रारदार बक्षी यांनी सांगितले की, संबंधीत ट्रेडर्स सांगली येथील असल्याचे भासवले जात असले तरी प्रत्यक्षात जागेवर त्यांचे काही स्तीत्व नाही, तसेच त्यांचा जीएसटी क्रमांकदेखील बनावट असल्याचे पुढे येत आहे. याप्रकरणी चिपळूण पोलीस अधिक तपास करीत आहे.
