नवी दिल्ली: आयपीएल २०२६ च्या ऐतिहासिक विजयानंतर भारतीय क्रिकेट चाहत्यांसाठी एक अत्यंत वाईट आणि धक्कादायक बातमी समोर येत आहे. टीम इंडियाचा स्टार फलंदाज आणि ‘किंग कोहली’ म्हणून ओळखला जाणारा विराट कोहली आगामी अफगाणिस्तानविरुद्धच्या एकदिवसीय (ODI) मालिकेत खेळू शकणार नाही. बीसीसीआयच्या (BCCI) सूत्रांनी दिलेल्या माहितीनुसार, विराट कोहलीला ‘हॅमस्ट्रिंग’ (स्नायूची) दुखापत झाली असून, यामुळे त्याला या मालिकेतून माघार घ्यावी लागली आहे. वृत्तसंस्था पीटीआयने (PTI) या संदर्भातील वृत्त दिले आहे.
भारत आणि अफगाणिस्तान यांच्यातील बहुप्रतिक्षित ३ सामन्यांची वनडे मालिका १३ जूनपासून सुरू होणार आहे. या मालिकेतील पहिला सामना धरमशाला येथील नयनरम्य मैदानावर खेळवला जाणार आहे. या महत्त्वाच्या मालिकेपूर्वीच विराट बाहेर पडल्याने भारतीय संघाला मोठा फटका बसला आहे.
आयपीएल फायनलमध्येच जाणवला होता त्रास! नुकत्याच संपलेल्या आयपीएल २०२६ च्या अंतिम सामन्यात विराट कोहलीनं रॉयल चॅलेंजर्स बेंगळुरूला (RCB) आपल्या वादळी खेळीच्या जोरावर विजेतेपद मिळवून दिलं. फायनलमध्ये त्याने अवघ्या ४२ चेंडूत नाबाद ७५ धावांची खेळी करत बेंगळुरूला ५ गडी राखून विजय मिळवून दिला होता. मात्र, याच सामन्यात फलंदाजी करताना आणि धावताना त्याला दुखापतीचा त्रास होत असल्याचं स्पष्ट दिसत होतं. यंदाच्या आयपीएल मोसमात विराटने १६ सामन्यांत ६७५ धावा कुटल्या आहेत, पण या तुफानी कामगिरीनंतर त्याच्या शरीरावर पडलेल्या ताणामुळे अखेर त्याला विश्रांती घेण्यास भाग पाडले आहे.
पुढील वर्ल्डकप आणि इंग्लंड दौऱ्यावर प्रश्नचिन्ह? पुढील वर्षी होणाऱ्या एकदिवसीय वर्ल्डकपच्या दृष्टीने विराट कोहलीचा फॉर्म आणि फिटनेस अत्यंत महत्त्वाचा मानला जात आहे. आयपीएलपूर्वी त्याने न्यूझीलंडविरुद्धच्या वनडे मालिकेत ३ सामन्यांत २४० धावा केल्या होत्या, ज्यात एक शतक आणि एका अर्धशतकाचा समावेश होता. मात्र, आता झालेल्या या हॅमस्ट्रिंग दुखापतीमुळे विराट जुलै महिन्यात होणाऱ्या इंग्लंड दौऱ्यात खेळणार की नाही, याबाबत क्रिकेट वर्तुळात मोठे प्रश्नचिन्ह निर्माण झाले आहे. भारत आणि इंग्लंड यांच्यात १४ ते १९ जुलै दरम्यान ३ वनडे सामने खेळवले जाणार आहेत.
रोहित शर्मा आणि हार्दिक पांड्याबाबत संभ्रम, संघ जाहीर बीसीसीआयने अद्याप विराट कोहलीच्या जागी कोणाला संघात स्थान मिळणार हे स्पष्ट केलेले नाही. दरम्यान, या मालिकेसाठी वरिष्ठ खेळाडू रोहित शर्मा आणि हार्दिक पांड्या यांना संघात स्थान देण्यात आले आहे, परंतु ते पूर्णपणे तंदुरुस्त (Fit) आहेत की नाही यावरच त्यांचे खेळणे अवलंबून असेल.
अफगाणिस्तानविरुद्धच्या वनडे मालिकेसाठी भारतीय संघ: शुभमन गिल (कर्णधार), रोहित शर्मा, श्रेयस अय्यर (उपकर्णधार), केएल राहुल (यष्टीरक्षक), इशान किशन (यष्टीरक्षक), हार्दिक पांड्या, नितीश कुमार रेड्डी, वॉशिंग्टन सुंदर, कुलदीप यादव, अर्शदीप सिंग, प्रसिद्ध कृष्णा, प्रिन्स यादव, गुरनूर ब्रार, हर्ष दुबे.
