लांजा (रत्नागिरी): लांजा–देवरुख मार्गावरील तळवडे फाट्याजवळ मंगळवारी रात्री एक अत्यंत थरारक आणि भीषण अपघात घडला. लांजाहून देवरुखच्या दिशेने वेगाने जाणाऱ्या एका टोयोटा कारला अचानक अचानक भीषण आग लागली. काही क्षणांतच या आगीने रौद्ररूप धारण केले आणि संपूर्ण कार आगीच्या भक्ष्यस्थानी पडली. सुदैवाने, कारचालकाने वेळेवर दाखवलेल्या प्रसंगावधानामुळे कोणतीही जीवितहानी झाली नाही आणि एक मोठा अनर्थ टळला.
नेमकी घटना काय घडली?
संगमेश्वर तालुक्यातील देवरुख (मार्लेश्वर फाटा) येथील रहिवासी धनंजय गोपाळ केतकर (वय ६३) हे मंगळवारी रात्री सुमारे ८:१५ वाजण्याच्या सुमारास आपल्या टोयोटा कारने (क्रमांक MH 01 FB 3774) लांजाहून देवरुखकडे जात होते. कार तळवडे फाट्यानजीक पोहोचली असताना, अचानक गाडीच्या इंजिनमधून मोठा आवाज आला आणि क्षणार्धात बोनेटमधून धुराचे लोट बाहेर पडू लागले.
परिस्थितीचे गांभीर्य लक्षात येताच केतकर यांनी अजिबात वेळ न गमावता तात्काळ कार रस्त्याच्या कडेला उभी केली आणि ते वेगाने गाडीबाहेर पडले. ते बाहेर पडताच काही सेकंदांतच आगीच्या तीव्र ज्वाळांनी संपूर्ण कारला कवेत घेतले. पाहता पाहता डोळ्यांसमोर संपूर्ण गाडी जळून खाक झाली.
पोलीस अन् स्थानिकांची धावपळ; देवरुखवरून आले अग्निशामक वाहन
गाडीला आग लागल्याचे दिसताच स्थानिक नागरिकांनी घटनास्थळाकडे धाव घेतली आणि आग विझवण्याचा प्रयत्न केला. घटनेची माहिती मिळताच लांजा पोलीस ठाण्याचे पोलीस निरीक्षक निलकंठ बगळे यांच्या मार्गदर्शनाखाली महिला पोलीस हवालदार उर्मिला शेडे, पोलीस शिपाई स्वप्निल कदम व उमाजी बजागे यांनी तातडीने घटनास्थळी पोहोचून वाहतूक सुरळीत केली व मदतकार्य सुरू केले.
मात्र, लांजा नगरपंचायतीकडे स्वतःचे अग्निशामक वाहन उपलब्ध नसल्याने शेजारच्या देवरुख नगरपंचायतीच्या अग्निशामक दलाला पाचारण करावे लागले. देवरुखवरून अग्निशमन दलाची गाडी घटनास्थळी पोहोचेपर्यंत कारचा बहुतांश भाग जळून राख झाला होता. जवानांनी अथक प्रयत्नांनंतर आगीवर पूर्णपणे नियंत्रण मिळवले.
स्वतंत्र अग्निशामक यंत्रणेची मागणी पुन्हा ऐरणीवर
काही दिवसांपूर्वीच लांजानिजीकच्या अंजनारी पुलाजवळ एका ट्रकला आग लागली होती, तेव्हाही मदतकार्यासाठी देवरुखच्याच अग्निशामक वाहनावर अवलंबून राहावे लागले होते. आता लागोपाठ घडलेल्या या दुसऱ्या दुर्घटनेमुळे लांजा शहर व परिसरासाठी स्वतंत्र, अद्ययावत अग्निशामक वाहन आणि यंत्रणा तात्काळ उपलब्ध करून द्यावी, अशी जोरदार मागणी स्थानिक नागरिकांमधून केली जात आहे.
दरम्यान, कारला अचानक आग लागण्याचे अचूक कारण अद्याप समोर आले नसून, लांजा पोलीस या अपघाताचा अधिक तपास करत आहेत.
