राजापूर: मुंबई-गोवा राष्ट्रीय महामार्गावरून प्रवास करणाऱ्या वाहनचालकांसाठी एक महत्त्वाची बातमी समोर येत आहे. राजापूर तालुक्यातील हातिवले येथील बंद असलेला टोलनाका पुन्हा सुरू करण्याच्या हालचाली प्रशासकीय पातळीवर वेगाने सुरू झाल्या आहेत. पुढील महिन्याच्या अखेरीस हा टोलनाका प्रत्यक्ष कार्यान्वित होण्याची शक्यता वर्तवली जात आहे. मात्र, टोलनाका सुरू होण्यापूर्वीच स्थानिक पातळीवर याविरोधात तीव्र असंतोष पाहायला मिळत असून, राजापूर तालुक्यातील स्थानिक नागरिकांसह स्थानिक वाहतूकदारांना संपूर्ण टोलमाफी द्यावी; अन्यथा तीव्र आंदोलन छेडले जाईल, असा स्पष्ट इशारा कोंढेतडचे माजी उपसरपंच अरविंद लांजेकर यांनी दिला आहे. यामुळे या भागात पुन्हा एकदा राजकीय आणि सामाजिक वातावरण तापण्याची चिन्हे दिसत आहेत.
पाच वर्षांपूर्वीच्या आंदोलनानंतर बंद होता टोलनाका
हातिवले टोलनाक्याचा वाद नवा नाही. सुमारे पाच वर्षांपूर्वी स्थानिक ग्रामस्थ आणि वाहनचालकांनी एकत्र येत स्थानिकांना टोलमधून पूर्ण सूट मिळावी, या प्रमुख मागणीसाठी महामार्गावर मोठे ठिय्या आंदोलन केले होते. जनक्षोभ लक्षात घेऊन त्यावेळी हा टोलनाका बंद ठेवण्याचा निर्णय घेण्यात आला होता. दरम्यान, नुकताच शेजारच्या सिंधुदुर्ग जिल्ह्यातील ओसरगाव येथील टोलनाका सुरू करण्यात आला आहे. त्यापाठोपाठ आता राजापूरमधील हातिवले टोलनाकाही सुरू करण्याच्या हालचालींना गती मिळाली आहे.
स्थानिक वाहनधारकांवर पडणार आर्थिक भुर्दंड
राजापूर शहर हे तालुक्यातील मुख्य बाजारपेठ आणि प्रशासकीय केंद्र आहे. त्यामुळे तालुक्यातील ग्रामस्थांना, व्यावसायिकांना आणि स्थानिक वाहनधारकांना दैनंदिन कामानिमित्त दिवसातून चार ते पाच वेळा राजापूर शहरात ये-जा करावी लागते. अशा परिस्थितीत प्रत्येक खेपेला टोल भरावा लागला, तर सर्वसामान्य वाहनधारकांचे मोठे आर्थिक नुकसान होणार असून हा भुर्दंड स्थानिकांना परवडणारा नाही.
स्थानिकांच्या या समस्येबाबत यापूर्वीही राष्ट्रीय महामार्ग प्राधिकरणाला (NHAI) अनेक निवेदने देण्यात आली होती. मात्र, अद्याप त्यावर कोणताही ठोस निर्णय झालेला नाही.
जबरदस्तीने टोलवसुली केल्यास रोष अटळ
राष्ट्रीय महामार्ग विभागाने स्थानिक भौगोलिक परिस्थिती आणि नागरिकांच्या दैनंदिन गरजांचा विचार करून स्थानिक वाहनांना टोलमधून पूर्ण सवलत जाहीर करावी, अशी आग्रही मागणी आता जोर धरत आहे. स्थानिकांना विश्वासात न घेता किंवा त्यांच्या मागण्यांकडे दुर्लक्ष करून जर प्रशासनाने जबरदस्तीने टोलवसुली सुरू केली, तर त्याला तीव्र जनआंदोलनाचा सामना करावा लागेल, असा इशारा स्थानिक नेतृत्वाने दिला आहे.
