मंडणगड (रत्नागिरी): रत्नागिरी जिल्ह्यातील मंडणगड परिसरातील केळवत घाटात एक भीषण रस्ते अपघात घडल्याची धक्कादायक घटना समोर आली आहे. घाटातील एका हॉटेलसमोर भरधाव वेगात आलेल्या महिंद्रा बोलेरो पिकअपने चुकीच्या दिशेने (Wrong Side) जाऊन समोरून येणाऱ्या दुचाकीला जोरदार धडक दिली. या अपघातात दुचाकीवरील दोघे जण गंभीर जखमी झाले असून दोन्ही वाहनांचे मोठे नुकसान झाले आहे.
नेमकं काय घडलं?
मिळालेल्या माहितीनुसार, १९ ऑगस्ट २०२६ रोजी सकाळी १०:०० वाजण्याच्या सुमारास हा अपघात घडला. बामणघर (ता. मंडणगड) येथील रहिवासी राजेश सयाजी चव्हाण (वय ५५ वर्षे) हे आपली ॲक्टिव्हा मोटारसायकल (क्र. MH-08 AR-7352) घेऊन नरेश गणपत जाधव यांच्यासोबत मंडणगडच्या दिशेने जात होते.
त्यांचा प्रवास सुरळीत सुरू असताना, केळवत घाटातील ‘माळराण हॉटेल’समोर मंडणगडच्या बाजूने भरधाव वेगाने येणाऱ्या एका महिंद्रा बोलेरो पिकअपच्या (क्र. MH-05 FJ-3806) चालकाने बेदरकारपणे वाहन चालवत थेट विरुद्ध बाजूला (Wrong Side) गाडी घातली आणि समोरून जाणाऱ्या ॲक्टिव्हाला जोरदार धडक दिली.
दोघांना गंभीर दुखापत, वाहनांचे मोठे नुकसान
धडक इतकी भीषण होती की दुचाकी रस्त्यावर फेकली गेली. यात चालक राजेश चव्हाण आणि त्यांच्या पाठीमागे बसलेले नरेश जाधव हे दोघेही गंभीर जखमी झाले. अपघातात दोन्ही वाहनांचा चक्काचूर झाला असून स्थानिक नागरिकांच्या मदतीने जखमींना तातडीने उपचारासाठी रुग्णालयात दाखल करण्यात आले.
पिकअप चालकावर गुन्हा दाखल
या प्रकरणी जखमी राजेश चव्हाण यांच्या तक्रारीवरून पोलिसांनी पिकअप चालक किसन कडाप्पा गायकवाड (रा. वाशी, नवी मुंबई) याच्याविरोधात गुन्हा दाखल केला आहे. मंडणगड पोलीस ठाण्यात भारतीय न्याय संहिता (BNS) २०२३ मधील कलम २८१, १२५(अ), १२५(ब) तसेच मोटार वाहन कायद्यातील कलम १८४ अन्वये कारवाई करण्यात आली असून, पोलीस या अपघाताचा पुढील सखोल तपास करत आहेत.
