रत्नागिरी जिल्हा परिषदेच्या नवीन इमारतीच्या बांधकामाची अखेर मुहूर्तमेढ रोवण्यात आली आहे. जिल्हा परिषद नवीन इमारत उभारणीसाठी निविदा मागवण्यात आल्या होत्या, त्यासाठी तीन जणांच्या निविदा आल्या होत्या. त्या पैकी जिल्हा परिषदेच्या विशेष सभेमध्ये नवीन प्रशासकीय इमारत उभारण्याचा ठेका पुण्यातील रायकॉन कन्स्ट्रक्शनला देण्याचा निर्णय सर्वानुमते घेण्यात आला. त्यामधून कमी दराने भरलेली निविदेला प्रथम प्राधान्य देण्यात आले आहे. त्यामुळे इमारत भूमीपूजनाचा मार्ग आता मोकळा झाला असून, पुढील दोन आठवड्यामध्येच हा कार्यक्रमाचे नियोजन केले जाणार आहे.
जि. प. विक्रांत जाधव यांच्या अध्यक्षतेखाली ऑनलाइन झालेल्या बैठकीत इमारतीचा ठेकेदार निश्‍चित करण्यावर शिक्कामोर्तब करण्यात आला आहे. पुण्यातील रायकॉन कन्स्ट्रक्शनने कमी दराने तर उर्वरित दोघांमध्ये नाशिकच्या क्रांती कन्स्ट्रक्शन आणि अहमदनगरच्या थोरात सिव्हील इंजिनिअर यांनी वाढीव दराने निविदा भरली होती. सभेमध्ये निविदा फोडल्यानंतर कमी दराने भरलेल्या रायकॉनला इमारत उभारणीचा ठेका देण्यात आला आहे.
४४ कोटी ३८ लाख रुपयांची ही निविदा ठरविण्यात आली आहे. येत्या काही दिवसात वर्कऑर्डर मिळणार असून त्यानंतर तत्काळ भुमिपूजनाचा कार्यक्रम घेण्यात येणार आहे. नवीन इमारत उभारणीसाठी सुमारे चार वर्षांचा कालावधी लागण्याची शक्यता आहे. या कालावधीमध्ये लागणारे साहित्य आणि अन्य गोष्टींच्या दरामध्ये वाढ होऊ शकते. हे लक्षात घेऊन राज्य शासनाने इमारतीसाठी सुमारे ५८ कोटी रुपयांचा निधी मंजूर केला आहे. चार वर्षामधील वर खाली होणाऱ्या खर्चाचा आधीच विचार करून, निविदेच्या रकमेपेक्षा अधिकची तरतूद यामध्ये करण्यात आली आहे. त्यामुळे जि. प. रत्नागिरीची हायटेक नवीन इमारतीचे बांधकाम लवकरच सुरु होणार आहे.
