गुहागर: पोटच्या मुलानेच आपल्या वृद्ध आईवर जीवघेणा हल्ला केल्याची एक अत्यंत धक्कादायक आणि संतापजनक घटना गुहागर तालुक्यातील पाटपन्हाळे गावडेवाडी येथे समोर आली आहे. दारूच्या नशेत धुंद असलेल्या मुलाने, जुन्या पोलीस तक्रारीचा राग मनात धरून आपल्या ६६ वर्षीय वृद्ध आईवर थेट लोखंडी गाडीचा पाटा फेकून मारला. या क्रूर हल्ल्यात वृद्ध माता गंभीर जखमी झाली असून, या घटनेमुळे संपूर्ण परिसरात तीव्र संताप व्यक्त होत आहे.
दारूचे व्यसन आणि सततचा छळ
मिळालेल्या माहितीनुसार, पाटपन्हाळे गावडेवाडी येथील रहिवासी असलेल्या ६६ वर्षीय पार्वती शंकर गावडे ४ जून रोजी सकाळी नेहमीप्रमाणे आपल्या घरी होत्या. दरम्यान, त्यांचा ४२ वर्षीय मुलगा राजेंद्र शंकर गावडे (सध्या राहणार – दिवा, ठाणे) हा तिथे आला. राजेंद्र याला दारूचे प्रचंड व्यसन आहे. या व्यसनापायी तो नेहमीच आईला अश्लील शिवीगाळ करायचा, जीवे मारण्याच्या धमक्या द्यायचा आणि मारहाण करायचा. रोजच्या या त्रासाला आणि छळाला कंटाळून आई पार्वती यांनी काही दिवसांपूर्वी गुहागर पोलीस ठाण्यात त्याच्याविरोधात तक्रार दाखल केली होती.
‘पोलीसात तक्रार देतेस काय?’ जुन्या रागातून सूड
आपल्या कृत्यांची पश्चात्ताप होण्याऐवजी, राजेंद्रच्या मनात आईने केलेल्या पोलीस तक्रारीचा राग धुमसत होता. ४ जून रोजी सकाळी ८:३० च्या सुमारास याच जुन्या रागाचा सूड उगवण्याच्या इराद्याने तो घरात शिरला. काही समजण्याच्या आतच त्याने घरातील लोखंडी गाडीचा जड पाटा उचलला आणि थेट आईच्या दिशेने फेकला. हा पाटा पार्वती यांच्या पायावर (ढोपराच्या खाली) अत्यंत जोरात लागल्याने त्या गंभीर जखमी झाल्या आणि वेदनेने विव्हळू लागल्या.
एवढा क्रूर हल्ला करूनही या नराधम मुलाचे मन द्रवले नाही. त्याने जखमी अवस्थेत पडलेल्या आईला पुन्हा अश्लील शिवीगाळ केली आणि “पोलीसात तक्रार देतेस काय?” असे म्हणत पुन्हा जीवे मारण्याची धमकी दिली.
जखमी आईची हिंमत; पोलिसांत धाव
पायाला गंभीर दुखापत झाली असतानाही वृद्ध आईने धीर सोडला नाही. त्यांनी तात्काळ गुहागर पोलीस ठाणे गाठले आणि आपल्या पोटच्या मुलाच्या क्रूर कृत्याची पोलिसांकडे रीतसर फिर्याद दिली.
वृद्ध महिलेवरील या गंभीर हल्ल्याची पोलिसांनी तातडीने दखल घेतली. ४ जून रोजी सायंकाळी ५:१३ वाजता गुहागर पोलिसांनी आरोपी मुलगा राजेंद्र गावडे याच्याविरुद्ध नवीन कायद्यानुसार, म्हणजेच भारतीय न्याय संहिता (BNS) २०२३ च्या कलम ११८(२) (गंभीर दुखापत करणे), ३५१(२), आणि ३५२ (जीवे मारण्याची धमकी देणे) अंतर्गत गुन्हा दाखल केला आहे. या प्रकरणाचा पुढील तपास गुहागर पोलीस करत असून परिसरातून या कलियुगी पुत्रावर कडक कारवाई करण्याची मागणी होत आहे.
