रत्नागिरी: ग्रामीण व शहरी भागातील नागरिकांना विविध सरकारी योजनांचा लाभ घेताना किंवा शासकीय दाखले काढताना होणारी पळापळ आता थांबणार आहे. रत्नागिरी जिल्हा प्रशासनाकडून नागरिकांना एकाच छताखाली सर्व शासकीय सेवा उपलब्ध करून देण्यासाठी जिल्ह्यात तब्बल २९० नवीन ‘आपले सरकार सेवा केंद्र’ (CSC) उभारण्याचा धोरणात्मक निर्णय घेण्यात आला आहे. यासाठी पात्र व इच्छुक उमेदवारांकडून अधिकृत अर्ज मागवण्याची प्रक्रिया सुरू झाली असून, १४ ऑगस्ट २०२६ रोजी सायंकाळी ५ वाजेपर्यंत अर्ज जमा करण्याचे आवाहन जिल्हाधिकारी मनुज जिंदल यांनी केले आहे.
नागरिकांची गैरसोय टळणार, एकाच छताखाली मिळतील सर्व सेवा
राज्य सरकारच्या डिजिटल महाराष्ट्र मोहिमेला गती देण्यासाठी आणि सामान्य प्रशासन विभागाच्या शासन निर्णयानुसार राज्यातील सेवा केंद्रांची संख्या दुप्पट करण्यात येत आहे. याच धोरणाचा भाग म्हणून रत्नागिरी जिल्ह्यातील विविध गावांमध्ये व शहरी भागात ही नवीन केंद्रं सुरू केली जात आहेत.
या केंद्रामुळे नागरिकांना उत्पन्नाचा दाखला, रहिवासी दाखला, जातीचे प्रमाणपत्र, सातबारा उतारे यांसारखे महत्त्वाचे दाखले आणि विविध शासकीय योजनांचे फॉर्म भरण्यासाठी तालुक्याच्या ठिकाणी किंवा शासकीय कार्यालयांचे खेटे मारावे लागणार नाहीत.
अर्ज कसा आणि कुठे करायचा?
-
अंतिम मुदत: १४ ऑगस्ट २०२६ (सायंकाळी ५:०० वाजेपर्यंत)
-
अर्ज स्वीकारण्याचे ठिकाण: जिल्हाधिकारी कार्यालय, रत्नागिरी.
-
निवड प्रक्रिया व माहिती: अर्ज छाननीनंतर पात्र आणि अपात्र उमेदवारांची अंतिम यादी रत्नागिरी जिल्ह्याच्या अधिकृत संकेतस्थळावर (www.ratnagiri.nic.in) प्रसिद्ध केली जाईल.
अधिक माहिती आणि संपर्कासाठी:
या योजनेचा लाभ घेऊ इच्छिणारे उमेदवार किंवा अर्ज प्रक्रियेबाबत अधिक माहिती हवी असल्यास नागरिक जिल्हा प्रशासनाच्या खालील भ्रमणध्वनी क्रमांकांवर संपर्क साधू शकतात:
-
संपर्क क्रमांक 1: ८३५५८६८०६७
-
संपर्क क्रमांक 2: ९०१८२०२८४१
ग्रामीण भागातील सुशिक्षित बेरोजगारांसाठी ही स्वयंरोजगाराची एक सुवर्णसंधी ठरणार असून जास्तीत जास्त इच्छुकांनी मुदतीपूर्वी अर्ज सादर करावेत, असे आवाहन प्रशासनाकडून करण्यात आले आहे.
