रत्नागिरी: दीर्घकालीन आजारपण आणि त्यातून होणाऱ्या असह्य शारीरिक वेदना माणसाचे धैर्य कसे खचवून टाकतात, याचा प्रत्यय देणारी एक अत्यंत दुर्दैवी घटना रत्नागिरी तालुक्यातून समोर आली आहे. तालुक्यातील राई-खापरेवाडी येथील एका ६७ वर्षीय वृद्धाने मणक्याच्या तीव्र आजाराला कंटाळून आपल्या राहत्या घरी गळफास लावून आत्महत्या केली. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, वासुदेव भागा खापरे (वय ६७, रा. राई-खापरेवाडी, रत्नागिरी) असे मृत वृद्धाचे नाव आहे. वासुदेव खापरे हे गेल्या पाच वर्षांपासून मणक्याच्या गंभीर समस्येने त्रस्त होते. या विकारावर त्यांचे जाकादेवी येथील एका खासगी रुग्णालयात नियमित उपचारही सुरू होते; मात्र आजाराच्या सततच्या त्रासामुळे व वेदनांमुळे ते मानसिकदृष्ट्या खचले होते.
उपचारादरम्यान अखेरचा श्वास
शनिवारी, २९ ऑगस्ट रोजी सकाळी आठ ते साडेआठच्या सुमारास घरात कोणी लक्ष देण्याच्या आत, खापरे यांनी राहत्या घरातील एका खोलीच्या लाकडी वाशाला सुती दोरी बांधून गळफास घेतला. ही बाब नातेवाईकांच्या निदर्शनास येताच त्यांनी तातडीने त्यांना खाली उतरवून उपचारासाठी रत्नागिरी येथील जिल्हा शासकीय रुग्णालयात दाखल केले. मात्र, प्रकृती अत्यंत चिंताजनक असल्याने अखेर दुपारी दीड वाजेच्या सुमारास उपचारादरम्यान त्यांची प्राणज्योत मालवली.
या क्लेशदायक घटनेची माहिती मिळताच रत्नागिरी ग्रामीण पोलिसांनी घटनास्थळी व रुग्णालयात भेट देऊन पंचनामा केला. पोलिसांनी याप्रकरणी आकस्मिक मृत्यूची नोंद केली असून अधिक तपास ग्रामीण पोलीस ठाण्याचे अधिकारी करत आहेत.
