रत्नागिरी: एकीकडे जिल्ह्यात विकासाच्या नावाखाली कोट्यवधी रुपयांचा निधी मंजूर झाल्याचे दावे केले जातात, तर दुसरीकडे ग्रामीण भागातील सर्वसामान्यांना साध्या उपचारांसाठीही पायपीट करावी लागत आहे. आरोग्य यंत्रणेच्या याच अत्यंत खालावलेल्या दर्जाविरोधात आणि प्रशासनाच्या निष्काळजीपणाला जाब विचारण्यासाठी आज, बुधवार २२ जुलै रोजी रत्नागिरी जिल्हा परिषद मुख्यालयावर ‘आरोग्य धडक मोर्चा’ धडकणार आहे.
व्हेंटिलेटरवर आरोग्य यंत्रणा: धोकादायक इमारती अन् डॉक्टरांची तीव्र टंचाई
रत्नागिरी जिल्ह्यातील ग्रामीण आरोग्य व्यवस्था सध्या अक्षरशः ‘व्हेंटिलेटरवर’ असल्याचे चित्र आहे. अनेक प्राथमिक आरोग्य केंद्रांच्या इमारती काळाच्या ओघात जीर्ण आणि धोकादायक बनल्या आहेत. पाऊस असो वा कडक ऊन, अशा पडक्या इमारतींमध्ये रुग्णांना उपचार घ्यावे लागत आहेत.
याहून गंभीर बाब म्हणजे, आरोग्य केंद्रांमध्ये डॉक्टरांची मोठी टंचाई असून कर्मचाऱ्यांची शेकडो पदे रिक्त पडून आहेत. वेळेवर वैद्यकीय अधिकारी उपलब्ध नसणे, आवश्यक औषधांचा तुटवडा आणि अत्यावश्यक वैद्यकीय उपकरणांचा अभाव यामुळे उपचारासाठी येणाऱ्या रुग्णांचे आणि त्यांच्या नातेवाईकांचे नाहक हाल होत आहेत.
“हा विकास नेमका कोणासाठी?” – संयोजकांचा रोखठोक सवाल
या आंदोलनाची हाक देणारे मुख्य संयोजक प्रथमेश गावणकर यांनी प्रशासकीय कारभारावर जोरदार ताशेरे ओढले आहेत. “विकासाच्या गप्पा मारल्या जातात, कोट्यवधींचा निधी खर्च दाखवला जातो, पण मूळ गरज असलेल्या आरोग्य सेवा मात्र ठप्प आहेत. जर सामान्य रुग्णाला वेळेत योग्य उपचार मिळत नसतील, तर मग हा कोट्यवधींचा विकास नेमका कोणासाठी सुरू आहे?” असा थेट सवाल गावणकर यांनी उपस्थित केला आहे.
आरोग्य ही प्रत्येक नागरिकाची मूलभूत गरज आणि हक्क आहे. झोपलेल्या जिल्हा परिषद प्रशासनाला जागे करण्यासाठी आणि आरोग्याचा हा ज्वलंत प्रश्न ऐरणीवर आणण्यासाठीच हा लढा उभारण्यात आल्याचे त्यांनी स्पष्ट केले.
जनतेला एकत्र येण्याचे आवाहन
आपल्या हक्काच्या आरोग्य सुविधा मिळवण्यासाठी आणि प्रशासनाविरोधात आवाज उठवण्यासाठी रत्नागिरी तालुक्यातील सर्व सुज्ञ व जागरूक नागरिकांनी या धडक मोर्चात मोठ्या संख्येने सहभागी व्हावे, असे आवाहन संयोजकांनी केले आहे.
