संगमेश्वर: रोजगाराच्या निमित्ताने मुंबईत राहून आपल्या कुटुंबाचा गाडा हाकणाऱ्या एका तरुण चाकरमान्याचा धावती ट्रेन पकडण्याच्या नादात अत्यंत दुर्दैवी अंत झाला आहे. संगमेश्वर तालुक्यातील शेंबवणे (गोमाणेवाडी) येथील ३३ वर्षीय अनिल बाळू बांबाडे हा तरुण गुरुवारी (२ जुलै) संगमेश्वर रोड रेल्वे स्थानकावर एका भीषण अपघाताचा बळी ठरला. सावंतवाडी-दिवा पॅसेंजरमध्ये घाईघाईने चढत असताना अचानक त्याचा पाय घसरला आणि तो थेट फलाट व धावत्या गाडीच्या मधल्या अरुंद, धोकादायक पोकळीत कोसळला. या गंभीर अपघातात जबर जखमी झालेल्या अनिलचा उपचारादरम्यान मृत्यू झाला असून, यामुळे संपूर्ण परिसरात हळहळ व्यक्त केली जात आहे.
फलाट क्रमांक १ वर प्रवाशांच्या डोळ्यांदेखत घडला थरार मिळालेल्या माहितीनुसार, गुरुवारी दुपारी नेहमीप्रमाणे साधारण १:४० वाजण्याच्या सुमारास संगमेश्वर रोड स्थानकाच्या फलाट क्रमांक १ वर गाडी क्रमांक १०१०६ ‘सावंतवाडी – दिवा एक्सप्रेस’ येऊन थांबली. मुंबईला आपल्या नोकरीवर परतण्यासाठी अनिल बांबाडे याच गाडीची वाट पाहत होता. गाडी स्थानकातून सुटू लागली असताना, धावती गाडी पकडण्याच्या प्रयत्नात अनिलचा पाय अचानक पायरीवरून घसरला. काही समजण्याच्या आतच तो फलाट आणि चालत्या गाडीच्या वेगात असलेल्या चाकांमधील मोकळ्या जागेत ओढला गेला. हा अत्यंत भीषण प्रसंग तिथे उपस्थित असणाऱ्या इतर प्रवाशांच्या डोळ्यांदेखत घडला. हा थरार पाहून स्थानकावर एकच एकच किंकाळ्या आणि गोंधळ उडाला.
रेल्वे पोलिसांची देवदूतासारखी तत्परता, पण नशिबाने दिली पाठ अपघात घडताच रेल्वे स्थानकावर कर्तव्यावर तैनात असलेले पोलीस शिपाई श्री. बुरकुले यांनी कसलाही विचार न करता तात्काळ मदतीसाठी धाव घेतली. अनिल रक्ताच्या थारोळ्यात पडला होता. बुरकुले यांनी अत्यंत संवेदनशीलता दाखवत वेळ न दवडता स्टेशन मास्तरांकडून तातडीने लेखी मेमो घेतला. रुग्णवाहिकेची वाट न पाहता त्यांनी एका खाजगी रिक्षाच्या मदतीने गंभीर जखमी अनिलला लागलीच संगमेश्वर ग्रामीण रुग्णालयात हलवले. रुग्णालयातील डॉक्टरांच्या पथकाने अनिलचे प्राण वाचवण्यासाठी प्रयत्नांची शर्थ केली. मात्र, शरीराला आणि अंतर्गत भागाला अतिशय गंभीर दुखापती झाल्यामुळे अखेर दुपारी ३:४० वाजता उपचारादरम्यान त्याची प्राणज्योत मालवली.
बांबाडे कुटुंबाचा मुख्य आर्थिक आधार हरपला; शेंबवणे गावावर शोककळा या काळजाचा थरकाप उडवणाऱ्या घटनेची माहिती मिळताच रत्नागिरी रेल्वे पोलीस ठाण्याचे पोलीस उपनिरीक्षक नवघरे यांनी तातडीने रुग्णालय आणि घटनास्थळी धाव घेतली. त्यांनी मृतदेहाचा इनक्वेस्ट पंचनामा केला. अनिल एका खाजगी कंपनीत नोकरी करत होता. तो आपल्या कुटुंबाचा मुख्य आर्थिक आणि कौटुंबिक कणा होता. त्याच्या अशा अकस्मात जाण्याने बांबाडे कुटुंबावर दुःखाचा डोंगर कोसळला असून त्यांचा हसताखेळता आधार हिरावला गेला आहे.
रत्नागिरी रेल्वे पोलीस ठाण्यात याप्रकरणी सध्या अकस्मात मृत्यूची नोंद करण्यात आली आहे. संगमेश्वर ग्रामीण रुग्णालयात शवविच्छेदन (Post-Mortem) झाल्यानंतर अनिलचा मृतदेह अश्रूभऱ्या डोळ्यांनी वाट पाहणाऱ्या त्याच्या कुटुंबीयांच्या ताब्यात देण्यात आला. या हृदयद्रावक घटनेमुळे संपूर्ण शेंबवणे गावावर शोककळा पसरली असून, धावत्या गाड्या पकडणे किती जीवघेणे ठरू शकते, याचीच जाणीव या निमित्ताने पुन्हा एकदा झाली आहे.
