लांजा नगरपंचायत प्रशासनाकडून लांजा शहराचा प्रारूप विकास योजना आराखडा (डि.पी. प्लॅन) जाहीर करण्यात आला आहे. विशेष बाब म्हणजे हा डी.पी. प्लॅन जाहीर करताना लांजा नगरपंचायत कार्यक्षेत्रातील शेतकरी, नागरिक यांना कोणत्याही प्रकारचे मार्गदर्शन वा माहिती देण्यात आलेली नाही. या प्लॅनमध्ये असलेल्या विविध झोनमध्ये नागरिकांचे होणारे नुकसान किंवा फायदे, लोकांना त्यांच्या जमीन जुमल्यांचा मिळणारा मोबदला तसेच तो म ोबदला कमी अधिक प्रमाणात आहे किंवा कसा काय? आदी सर्वच प्रश्नांबाबत नागरिकांमध्ये संभ्रमावस्था निर्माण झाली आहे. त्यामुळे या संदर्भात नगरपंचायत प्रशासनाकडून योग्य ती कार्यवाही व्हावी अशी मागणी भाजपाचे माजी नगरसेवक संजय यादव यांनी केली आहे. दरम्यान, डी.पी. प्लॅन संदर्भात पुरेशी माहिती नसल्याने लांजावासियांचे मोठे नुकसान होणार असतानाही अशा परिस्थितीत विविध राजकीय पुढाऱ्यांकडून मात्र याबाबत मौन पाळले जात असल्याने सखेद आश्चर्य व्यक्त केले जात आहे.या प्रारूप विकास आराखड्या संदर्भात रत्नागिरी-सिंधुदुर्ग लोकसभा मतदारसंघाचे खासदार नारायण राणे यांची भेट घेवून त्यांच्याशी चर्चा करणार असल्याचे माजी नगरसेवक संजय यादव यांनी सांगितले.
लांजा नगरपंचायत प्रशासनाकडून प्रारूप विकास योजना आराखडा (डि.पी. प्लॅन) जाहीर करण्यात आला आहे. मंगळवार दि. २५ मार्च रोजी हा प्लॅन ओपन करण्यात आला असून गुरुवार दि. २७ मार्च रोजी नगरपंचायत कार्यालय येथे प्लॅनचा नकाशा नागरिकांच्या अवलोकनासाठी प्रसिद्ध करण्यात आला. सोमवार दि. २८ एप्रिल पर्यंत नागरिकांनी या संदर्भात आपल्या हरकती घेण्याच्या सूचना करण्यात आल्या आहेत. या हरकती नागरिकांना लांजा नगरपंचायत कार्यालयात नोंदवायच्या आहेत. या डी.पी. प्लॅनमध्ये २८ मैदाने तसेच मोठ-मोठे रस्ते प्रस्तावित आहेत. या रस्त्यांच्या कामांमध्ये अनेक शेतकऱ्यांच्या जमिनी किंवा घर देखील जाण्याची भीती आहे. मात्र त्या संदर्भात नागरिकांना त्यांच्या जमिन जागेचा मोबदला काय मिळणार? किंवा कशा प्रकारे मिळणार? किंवा मिळणारच नाही? असे अनेक प्रश्न अनुत्तरित आहेत. याशिवाय अनेक ठिकाणी रस्त्यांमुळे जागांचे विभाजन होणार आहे. त्यामुळे शेतकऱ्यांचे मोठ्या प्रमाणात आर्थिक नुकसान देखील होणार असून याबाबत नागरिकांना नेमकी कशा पद्धतीने नुकसान भरपाई मिळणार याबाबतची माहिती अद्यापही देण्यात आलेली नाही.
याबाबत माहिती देताना भाजपाचे माजी नगरसेवक संजय यादव यांनी सांगितले की, सन २०२२ पासून भाजपाचे नगरसेवक म्हणून मी स्वतः आणि माझे सहकारी माजी नगरसेवक मंगेश लांजेकर यांनी या डी.पी. प्लॅन अर्थात प्रारूप विकास आराखडा ओपन करायला दिला नव्हता. मात्र नगरपंचायत’ बॉडीचा कालावधी संपल्यानंतर प्रशासनाने स्वतःच्या मर्जीने तो डि.पी. प्लॅन ओपन केला आहे. सदर डी.पी. प्लॅन हा सांताक्रुज मुंबई येथील मे. टंडन अर्बन सोल्युशन प्रायव्हेट लिमिटेड या कंपनीला देण्यात आलेला आहे. मात्र या कंपनीच्या कोणत्याही अधिकाऱ्यांकडून नागरिकांना डि.पी. प्लॅनबाबत मार्गदर्शन किंवा माहिती देण्यात आलेली नाही. लोकांना या डि.पी. प्लॅनबाबत माहिती द्यावी यासाठी मे.. टंडन अर्बन सोल्युशन प्रायव्हेट लिमिटेड या कंपनीकडे पत्रव्यवहार देखील करण्यात आला होता. मात्र कंपनीकडून कोणत्या प्रकारची भेट देण्यात आलेली नाही. तसेच लांजा नगरपंचायत प्रशासनाकडून देखील नागरिकांना या डी.पी. प्लॅन संदर्भात मार्गदर्शन करण्यात आलेले नाही.
सर्वसामान्य शेतकऱ्याला, नागरिकाला या डी.पी. प्लॅनची कोणत्याही प्रकारची कल्पना नाही. त्यांचा अर्थ कसा लावायचा? त्याचप्रमाणे या डी.पी. प्लॅनमध्ये आपल्याला जमीन जागेचा मोबाईल कसा मिळणार? याची देखील लोकांना माहिती नाही. या संदर्भात नागरिकांमध्ये मोठ्या प्रमाणात संभ्रमावस्था असून लोकांनी वेळेत हरकती न घेतल्यास त्यांना मोठ्या नुकसानीला समोरे जावे लागण्याची शक्यता आहे. या पार्श्वभूमीवर विविध राजकीय पक्षांच्या पुढाऱ्यांकडून मात्र या संदर्भात मौन पाळण्यात आलेले आहे. त्यामुळे लांजा शहराला कोणी वाली आहे की नाही? असा प्रश्न यामुळे नागरिकांतून विचारला जात आहे.
