रत्नागिरी: उन्हाळ्याची सुट्टी संपवून, कोकणातील आपल्या गावाकडून पुन्हा मुंबईच्या दिशेने निघालेल्या हजारो चाकरमान्यांना रविवारी कोकण रेल्वेच्या भोंगळ कारभाराचा प्रचंड फटका बसला. रेल्वे प्रशासनाच्या ढिसाळ नियोजनामुळे ऐन गर्दीच्या वेळी सर्वच प्रमुख गाड्या तब्बल ११ तास उशिराने धावत होत्या. यामुळे मुंबईतून कोकणात येणारे आणि कोकणातून मुंबईकडे जाणारे हजारो प्रवासी दुपारपासून थेट मध्यरात्री दीड वाजेपर्यंत रेल्वे स्थानकांवर ताटकळत उभे होते. प्रशासनाच्या या मनमानी आणि अयोग्य कारभारामुळे प्रवाशांमधून तीव्र संताप व्यक्त केला जात आहे.
मान्सूनपूर्व कामे आणि एकेरी मार्ग ठरतोय डोकेदुखी मे महिन्याच्या सुरुवातीपासूनच उन्हाळी सुट्ट्यांमुळे रेल्वे गाड्यांना पाय ठेवायला जागा नाही, अशी परिस्थिती आहे. अशातच रेल्वेने सुरुवातीला एकेरी मार्गाच्या (सिंगल लाईन) देखभाल-दुरुस्तीची कामे हाती घेतली होती. त्यामुळे तेव्हाही गाड्या १५ ते १६ तास उशिराने धावत होत्या. तो त्रास कमी होतो न होतो, तोच आता कोकण रेल्वेने मान्सूनपूर्व कामांचा धडाका लावला आहे. या कामांमुळे गाड्यांचा वेग कमालीचा मंदावला असून संपूर्ण वेळापत्रकाचा पुरता बोजवारा उडाला आहे.
कोकण रेल्वेच्या या मार्गावर दररोज सरासरी ७६ रेल्वेगाड्या धावतात. उन्हाळी हंगामातील गर्दी पाहता रेल्वेने जादा विशेष गाड्या (समर स्पेशल) सुरू केल्या खऱ्या, पण मुळात मार्ग एकेरी असल्यामुळे आणि गाड्यांचे क्रॉसिंग किंवा वेळेचे योग्य नियोजन न जमल्यामुळे ही बिकट परिस्थिती निर्माण झाल्याचे रेल्वे प्रशासनाकडून सांगण्यात येत आहे.
कोणती गाडी किती तास उशिराने? रविवारच्या सुट्टीचा दिवस असल्याने मुंबईकडे परतणाऱ्या प्रवाशांची संख्या मोठी होती, मात्र गाड्यांच्या विलंबाने सर्वांचेच पुरते हाल केले:
-
मडगाव-एलटीटी एक्स्प्रेस (गाडी क्र. १११००): ही गाडी तब्बल ११ तास उशिराने धावत होती. विशेष म्हणजे हीच गाडी मुंबईहून येतानाही (एलटीटी-मडगाव एक्स्प्रेस ११०९९) १ तास उशिराने आली होती.
-
सीएसएमटी सुपर एक्स्प्रेस (गाडी क्र. ०१०२०): तब्बल ७ तास विलंबाने धावत होती.
-
कोकणकन्या एक्स्प्रेस (गाडी क्र. २०११२): ही गाडी ३ तास उशिराने धावत होती.
पाण्यासाठीही झाले हाल; चाकरमान्यांचे मोठे नुकसान कोकण रेल्वेच्या विविध लहान-मोठ्या स्थानकांवर तासनतास अडकून पडलेल्या प्रवाशांना साधे पिण्याचे पाणी किंवा इतर मूलभूत सुविधाही पुरेशा प्रमाणात मिळाल्या नाहीत. भर उन्हाळ्यात पाण्याच्या टंचाईमुळे लहान मुले, महिला आणि वृद्ध प्रवाशांचे अतोनात हाल झाले.
रविवारची सुट्टी संपवून सोमवारी मुंबईत आपापल्या नोकरी-धंद्यावर वेळेत हजर राहण्याचे नियोजन केलेल्या हजारो चाकरमान्यांचे गणित यामुळे पूर्णपणे बिघडले. अनेकांना मानसिक त्रासासोबतच सोमवारी ऑफिसला लेट झाल्यामुळे किंवा अनुपस्थित राहावे लागल्यामुळे मोठ्या आर्थिक नुकसानीलाही सामोरे जावे लागले आहे.
‘एलटीटी-मडगाव एक्स्प्रेस’ सावंतवाडीपर्यंतच चालवा; प्रवाशांची मागणी मे महिन्याच्या पहिल्या आठवड्यापासून ते ३१ मे पर्यंत गाडी क्र. ११०९९/१११०० एलटीटी-मडगाव एक्स्प्रेस ही गाडी सतत लेट धावत आहे. कोकणातून मुंबईकडे येणाऱ्या प्रवाशांची संख्या या गाडीत सर्वात जास्त असते. मडगाववरून सुटतानाच ही गाडी उशिराने निघत असल्यामुळे पुढे संपूर्ण वेळापत्रक बिघडते. त्यामुळे कोकण रेल्वे प्रशासनाने प्रवाशांचा त्रास कमी करण्यासाठी ही गाडी मडगाव ऐवजी थेट ‘सावंतवाडी’ स्थानकापर्यंतच चालवावी, जेणेकरून ती वेळेवर धावू शकेल, अशी आग्रही मागणी आता रेल्वे प्रवाशांकडून केली जात आहे.
