खेड: मुंबई-गोवा महामार्ग आणि अपघातांचे सत्र जणू संपता संपत नाहीये. असाच एक मन हेलावून टाकणारा आणि काळजाचा थरकाप उडवणारा भीषण अपघात सोमवार, ८ जून रोजी दुपारी १ वाजण्याच्या सुमारास कशेडी घाटात घडला. कशेडी घाटातील भोगाव गावाच्या हद्दीत एका भरधाव कारचालकाचे वाहनावरील नियंत्रण सुटले आणि ही कार पुढे चाललेल्या एका डंपरच्या मागील भागावर प्रचंड वेगाने जाऊन आदळली. हा अपघात इतका भयानक होता की, यामध्ये कल्याण येथील एका ३० वर्षीय तरुणाला आपले प्राण गमवावे लागले आहेत, तर त्याची ६३ वर्षीय वृद्ध आई अत्यंत गंभीर जखमी झाली असून सध्या मृत्यूशी झुंज देत आहे.
सुसाट कार आणि थेट डंपरमध्ये विळखा…
निकेश बालन (वय ३० वर्ष, रा. कल्याण) असे अपघातात मृत्यू झालेल्या दुर्दैवी तरुणाचे नाव आहे, तर त्यांच्या गंभीर जखमी झालेल्या आईचे नाव लीसी बालन (वय ६३ वर्ष) असे आहे. सोमवारच्या दुपारी नेहमीप्रमाणे महामार्गावर वाहनांची ये-जा सुरू होती. निकेश आपल्या आईसोबत कारने मुंबईच्या दिशेने प्रवास करत होता. कार कशेडी घाटातील भोगाव परिसराच्या हद्दीत आली असताना अचानक निकेशचा कारवरील ताबा सुटला. काही सेकंदांतच काय होणार याचा अंदाज येण्यापूर्वीच ही भरधाव कार पुढे जाणाऱ्या डंपरच्या मागच्या बाजूला अत्यंत वेगाने घुसली.
धडक एवढी भीषण होती की झालेल्या प्रचंड आवाजाने संपूर्ण परिसर हादरून गेला. कारच्या पुढच्या भागाचा अक्षरशः चक्काचूर झाला होता. आजूबाजूने जाणाऱ्या इतर वाहनचालकांनी आणि स्थानिक नागरिकांनी तात्काळ गाडीच्या दिशेने धाव घेतली. कारचा पत्रा कापून आत रक्ताच्या थारोळ्यात पडलेल्या निकेश आणि त्याच्या आईला बाहेर काढण्यात आले. दोघांचीही प्रकृती अत्यंत चिंताजनक होती.
खाकी वर्दी मदतीला धावली, पण नियतीला काही वेगळेच मान्य होते…
अपघाताची माहिती मिळताच कशेडी पोलीस मदत केंद्राचे पोलीस उपनिरीक्षक रामेश्वर ढाकणे, उपनिरीक्षक गिमनेकर, हवालदार केदार आणि त्यांच्या पथकाने एका मिनिटाचाही विलंब न लावता थेट घटनास्थळ गाठले. पोलिसांनी स्थानिक लोकांच्या मदतीने तातडीने रुग्णवाहिका बोलावून दोन्ही जखमींना पोलादपूर येथील ग्रामीण रुग्णालयात दाखल केले.
डॉक्टरांनी निकेशवर तात्काळ उपचार सुरू केले, मात्र डोक्याला आणि छातीला गंभीर दुखापत झाल्यामुळे उपचारादरम्यान निकेशची प्राणज्योत मालवली. ऐन उमेदीच्या काळात तरुण मुलाचा असा अंत झाल्याने पोलादपूर रुग्णालयात उपस्थितांचे डोळे पाणावले. दुसरीकडे, त्याची वृद्ध आई लीसी बालन यांची प्रकृती सुद्धा अत्यंत गंभीर आणि चिंताजनक असल्याने त्यांना पुढील तातडीच्या उपचारासाठी कळंबोली येथील एमजीएम (MGM) रुग्णालयात हलवण्यात आले असून तिथे त्यांच्यावर उपचार सुरू आहेत.
महामार्गावरील वाहतूक काही काळ ठप्प
या भीषण अपघातामुळे मुंबई-गोवा महामार्गावरील वाहतूक काही काळासाठी पूर्णपणे विस्कळीत झाली होती आणि रस्त्याच्या दोन्ही बाजूंना वाहनांच्या लांबच लांब रांगा लागल्या होत्या. कशेडी पोलिसांनी घटनेचा रितसर पंचनामा केला आणि हायवेवरील क्रेन पाचारण करून अपघातग्रस्त कार आणि डंपर रस्त्याच्या बाजूला केले. रस्ता साफ केल्यानंतर घाटातील वाहतूक पुन्हा एकदा पूर्ववत करण्यात आली असून खेड पोलीस या अपघाताचा पुढील तपास करत आहेत.
