रत्नागिरी: गेल्या काही दिवसांपासून दडी मारून बसलेला मान्सून अखेर रत्नागिरीत सक्रिय झाला आहे. सोमवार रात्रीपासून सुरू झालेल्या मुसळधार पावसाने आणि सोसाट्याच्या वादळी वाऱ्याने संपूर्ण रत्नागिरी शहराला अक्षरशः झोडपून काढले. या पहिल्याच मोठ्या पावसामुळे मंगळवारी पहाटेपासूनच शहरातील जनजीवन पूर्णपणे विस्कळीत झाले असून जागोजागी झाडे कोलमडणे, दरडी कोसळणे आणि रस्ते पाण्याखाली जाण्याच्या घटना घडल्या आहेत. प्रशासनाने पावसाळापूर्व कामे चोख केल्याचे मोठे दावे केले होते, मात्र पहिल्याच पावसात या दाव्यांची पोलखोल झाली असून ठिकठिकाणी साचलेले पाणी आणि चिखलामुळे नागरिकांचे प्रचंड हाल झाले आहेत.
फगरवठार येथे ७० फूट संरक्षक भिंत कोसळली, मोठा अनर्थ टळला
शहरातील मधला फगरवठार परिसरात मंगळवारी सकाळी ७ च्या सुमारास एक मोठी आणि भीतीदायक दुर्घटना घडली. मुसळधार पावसामुळे येथील एका मोठ्या संरक्षक भिंतीच्या खालची माती पूर्णपणे खचली. यामुळे सुमारे ७० ते ८० फूट लांबीची ही भिंत प्रचंड आवाजासह कोसळली. सुदैवाने यावेळी तिथे कोणी नसल्याने मोठी जीवितहानी टळली. मात्र, यामुळे मधला फगरवठारकडे जाणारा मुख्य रस्ता आता अत्यंत धोकादायक बनला आहे. रत्नागिरी नगर परिषदेने सुरक्षेचा उपाय म्हणून हा रस्ता वाहतुकीसाठी तातडीने बंद केला आहे. या कोसळलेल्या भिंतीच्या अगदी खालच्या भागात मोठी लोकवस्ती असल्याने आता खालच्या फगरवठारमधील घरांना मोठा धोका निर्माण झाला असून प्रशासनाने येथील रहिवाशांना सतर्क राहण्याचा इशारा दिला आहे.
७ तास युद्धपातळीवर काम करून वीजपुरवठा केला पूर्ववत
फगरवठार येथे भिंत कोसळली तेव्हा शेजारी असलेले एक मोठे आंब्याचे झाडही मुळासकट उखडून विजेच्या तारांवर पडले. यामुळे येथील विजेचे खांब आणि तारा तुटल्याने संपूर्ण परिसराचा वीजपुरवठा खंडित झाला. घटनेची माहिती मिळताच नगर परिषद प्रभाग १ चे नगरसेवक व पाणी सभापती निमेश नायर यांनी सकाळी ७ वाजेपासून दुपारी दीड वाजेपर्यंत स्वतः घटनास्थळी थांबून कामावर देखरेख ठेवली. महावितरण आणि नगर परिषदेच्या आपत्कालीन पथकाने तब्बल ७ तास युद्धपातळीवर काम करून ते झाड हटवले आणि परिसराचा वीजपुरवठा पुन्हा सुरू केला.
महामार्गाच्या अर्धवट कामामुळे घरात शिरला चिखल; लोकप्रतिनिधींवर नागरिक संतापले
परवटवणे परिसराजवळ मिऱ्या-नागपूर महामार्गाचे काम सध्या अर्धवट अवस्थेत रखडले आहे. या अर्धवट कामामुळे पावसाच्या पाण्यासोबत डोंगरावरील प्रचंड चिखल वाहून थेट खालच्या फगरवठार परिसरातील लोकवस्तीत घुसला. येथील स्थानिक रहिवासी पाटणकर आणि दीक्षित यांच्या घरांच्या अंगणात आणि परिसरात चिखलाचे साम्राज्य निर्माण झाल्याने त्यांना घरातून बाहेर पडणेही कठीण झाले होते. अशा कठीण परिस्थितीत स्थानिक लोकप्रतिनिधींनी (नगरसेवकांनी) नागरिकांचे फोन उचलणे टाळल्यामुळे रहिवाशांमध्ये तीव्र संताप व्यक्त होत आहे. अखेर नागरिकांनी थेट प्रशासनाशी संपर्क साधून मदत मागवली.
शहरात ठिकठिकाणी दरडी कोसळल्या आणि पूरसदृश स्थिती
शहरातील इतर भागांतही पावसाने जोरदार फटका दिला आहे:
-
कर्ला-आंबेशेत: येथील जीजीपीएस हायस्कूलच्या मागील रस्त्यावर पहाटेच्या सुमारास दरड कोसळली. सुदैवाने वाहतूक एका बाजूने सुरू राहिल्याने मोठा जाम झाला नाही.
-
झाडगाव: येथे मुख्य रस्त्यावरच आंब्याचे विस्तीर्ण झाड उन्मळून पडल्याने वाहतूक पूर्णपणे ठप्प झाली होती. पालिका कर्मचाऱ्यांनी २ ते ३ तास मेहनत घेऊन हे झाड बाजूला केले.
-
मारुती मंदिर परिसर: येथील स्टेडियममागील भाजी मार्केटजवळ पालिकेने यंदा गटारे साफ न केल्याचे उघडे पडले. रस्ते आणि गटारे एक झाल्याने संपूर्ण परिसरात गुडघाभर पाणी साचले होते.
-
रामआळी: शहराच्या या सखल भागात पहाटेच्या वेळी पूरसदृश परिस्थिती निर्माण झाली होती, मात्र दुपारनंतर पाऊस ओसरल्याने पाणी हळूहळू ओसरले.
