संगमेश्वर: संगमेश्वर तालुक्यातील सायले माईनवाडी परिसरात गुरुवारी रात्री एका भयंकर आणि थरारक प्रसंगाने गावकऱ्यांची झोप उडवली. रात्री साधारण १० वाजण्याच्या सुमारास, गावातील एका सुमारे २० फूट खोल सिमेंट-काँक्रिटच्या विहिरीतून काही विचित्र आवाज येऊ लागल्याने गावकऱ्यांनी डोकावून पाहिले. विहिरीच्या आतील एका लहानशा सिमेंटच्या कठड्यावर जीव मुठीत धरून एक पूर्ण वाढ झालेला बिबट्या बसलेला होता.
काळोखी रात्र आणि समोर खोल विहिरीत अडकलेला हिंस्र प्राणी – पण अशा बिकट परिस्थितीतही गावकऱ्यांनी प्रसंगावधान राखले. गावच्या पोलीस पाटलांनी क्षणाचाही विलंब न लावता देवरूख वनविभागाला याबाबत तातडीने माहिती दिली.
रात्रीचा अंधार अन् वनविभागाचे नियोजनबद्ध ऑपरेशन
घटनेचे गांभीर्य ओळखून देवरूखचे वनपाल सागर गोसावी यांनी आपल्या पथकासह बचाव साहित्याची तात्काळ जुळवाजुळव केली आणि घटनास्थळी धाव घेतली. विहिरीत पाणी आणि आत अडकलेला घाबरलेला बिबट्या यामुळे हे रेस्क्यू ऑपरेशन अतिशय आव्हानात्मक होते. थोडीशी चूकसुद्धा बिबट्याच्या किंवा बचाव पथकाच्या जिवावर बेतू शकत होती.
वनविभागाच्या अनुभवी पथकाने अत्यंत चाणाक्षपणे एक मोठा लोखंडी पिंजरा मजबूत दोऱ्यांच्या साहाय्याने विहिरीच्या आत सोडला. विहिरीतील कठड्यावर अडकलेल्या बिबट्याने स्वतःचा जीव वाचवण्यासाठी काही क्षणांतच त्या पिंजऱ्यात प्रवेश केला. बिबट्या पिंजऱ्यात प्रवेश करताच पथकाने पिंजऱ्याचे दार बंद करून त्याला सुरक्षितपणे विहिरीबाहेर खेचून काढले.
वैद्यकीय तपासणीनंतर निसर्गाच्या कुशीत मुक्त
विहिरीबाहेर काढल्यानंतर देवरूख येथील पशुसंवर्धन विभागाच्या डॉक्टरांकडून बिबट्याची सखोल वैद्यकीय तपासणी करण्यात आली. सुदैवाने, बिबट्याला कोणतीही गंभीर दुखापत झालेली नव्हती आणि तो पूर्णपणे तंदुरुस्त असल्याचे डॉक्टरांनी स्पष्ट केले. त्यानंतर वरिष्ठ अधिकाऱ्यांच्या मार्गदर्शनाखाली या बिबट्याला मानवी वस्तीपासून दूर त्याच्या मूळ नैसर्गिक अधिवासात (जंगलात) सुरक्षितपणे सोडून देण्यात आले.
हे धाडसी ऑपरेशन विभागीय वन अधिकारी गिरीजा देसाई, सहाय्यक वनसंरक्षक प्रियंका लगड आणि परिक्षेत्र वन अधिकारी विक्रम गुरव यांच्या मार्गदर्शनाखाली वनपाल सागर गोसावी, वनरक्षक आकाश कडूकर, सुरज तेली व प्राणीमित्र अनुराग आखाडे यांनी स्थानिक गावकऱ्यांच्या सहकार्याने यशस्वीरीत्या पार पाडले.
वनविभागाचे आवाहन:
गावात किंवा परिसरात कोणताही वन्यप्राणी संकटात सापडलेला दिसल्यास नागरिकांनी स्वतः धोक्यात न पडता वनविभागाच्या टोल फ्री क्रमांक १९२६ वर तत्काळ संपर्क साधावा.
