रत्नागिरी: कोकण रेल्वेच्या उभारणीसाठी आपल्या हक्काच्या जमिनी देणाऱ्या प्रकल्पग्रस्तांचा संघर्ष अजूनही संपलेला नाही. कोकण रेल्वे प्रशासनाकडून लवकरच सुरू होणाऱ्या आगामी भरती प्रक्रियेत अत्यंत कडक आणि जाचक अटी लागू करण्यात आल्याने प्रकल्पग्रस्तांमध्ये तीव्र संतापाची लाट उसळली आहे. या अन्यायकारक अटी तातडीने मागे न घेतल्यास संपूर्ण कोकणात तीव्र ‘रेल रोको’ आंदोलन छेडण्याचा इशारा ‘कोकणभूमी प्रकल्पग्रस्त कृती समिती’ने दिला आहे.
रत्नागिरीत प्रकल्पग्रस्तांची महत्त्वपूर्ण बैठक
कोकण रेल्वे प्रकल्पग्रस्तांच्या प्रदीर्घ काळापासून प्रलंबित असणाऱ्या विविध प्रश्नांवर तोडगा काढण्यासाठी आणि पुढील रणनीती ठरवण्यासाठी ‘कोकणभूमी प्रकल्पग्रस्त कृती समिती’ची महत्त्वपूर्ण कार्यकारिणी बैठक रत्नागिरीत पार पडली. या बैठकीला रत्नागिरी, सिंधुदुर्ग आणि रायगड या तिन्ही जिल्ह्यांतील प्रकल्पग्रस्त, प्रतिनिधी आणि पदाधिकारी मोठ्या संख्येने उपस्थित होते.
बैठकीत बोलताना समितीचे अध्यक्ष संतोष चव्हाण यांनी सांगितले की, “प्रकल्पग्रस्तांच्या न्याय्य हक्कासाठी ही समिती २०१० पासून सातत्याने लढा देत आहे. कोकण रेल्वेचे व्यवस्थापकीय संचालक (MD) संतोष झा यांनी प्रकल्पग्रस्तांची वयोमर्यादा वाढवून ४५ वर्षे केली आणि १२/२ च्या नोटीस अंतर्गत पात्र ठरणाऱ्या उमेदवारांना अधिक संधी उपलब्ध करून दिली, या निर्णयाचे आम्ही मनापासून स्वागत करतो. परंतु, आता भरती प्रक्रियेत ज्या नव्या अटी लादल्या आहेत, त्यामुळे अनेक प्रकल्पग्रस्त उमेदवार या संधीपासून वंचित राहण्याची भीती निर्माण झाली आहे.”
प्रकल्पग्रस्तांचे प्रमुख आक्षेप आणि मागण्या:
-
‘ग्रुप डी’च्या सामान्य पदांसाठी निगेटिव्ह मार्किंग कशासाठी?
कोकण रेल्वेत ‘डी ग्रुप’ (Group D) मधील अगदी प्राथमिक स्वरूपाच्या पदांसाठी भरती होत आहे. अशा सामान्य आणि मैदानी कामाच्या पदांसाठी कठीण निगेटिव्ह मार्किंग (Negative Marking) पद्धत लागू करणे अन्यायकारक आहे. त्यामुळे ही पद्धत तात्काळ बंद करावी, अशी ठाम मागणी समितीने केली.
-
४५ व्या वर्षी ३५ किलो वजन घेऊन धावणे जीवावर बेतणारे!
सध्याच्या निकषांनुसार उमेदवाराला १ किलोमीटर अंतर अवघ्या ४ मिनिटे १५ सेकंदांत पूर्ण करावे लागणार आहे. त्यापाठोपाठ ३५ किलो वजन उचलून १०० मीटर धावण्याची कठीण शारीरिक चाचणी (Physical Efficiency Test) ठेवण्यात आली आहे. वयोमर्यादा ४५ वर्षांपर्यंत शिथिल करण्यात आली असली, तरी या वयात इतकी खडतर शारीरिक चाचणी घेणे उमेदवारांच्या आरोग्यासाठी अत्यंत धोक्याचे आणि जोखमीचे ठरू शकते. त्यामुळे ही शारीरिक चाचणी रद्द करावी किंवा निकष शिथिल करावेत.
लोकप्रतिनिधींना साकडे; निर्णय न झाल्यास आंदोलनाचा पवित्रा
आपल्या न्याय्य मागण्यांचे सविस्तर निवेदन कोकण रेल्वेचे व्यवस्थापकीय संचालक संतोष झा यांच्यासह तिन्ही जिल्ह्यांतील खासदार आणि आमदारांना लेखी तसेच ई-मेलद्वारे पाठवण्याचा निर्णय या बैठकीत घेण्यात आला. भरती प्रक्रिया प्रत्यक्ष सुरू होण्यापूर्वी या जाचक अटी हटवून प्रकल्पग्रस्तांना दिलासा दिला नाही, तर संपूर्ण कोकण रेल्वे मार्गावर चक्काजाम करत तीव्र ‘रेल रोको’ आंदोलन करण्यात येईल, असा स्पष्ट इशारा कृती समितीने दिला आहे.
या बैठकीला समितीचे कार्याध्यक्ष विनायक मुकादम, गणेश राजमाने, अनिल कुंभार, सचिन कुंभार, स्वरूप मुकादम, करण भुजबळराव, दिगंबर भारती, बबन नारकर, नीलेश गुरव, अस्मिता कांबळे आणि योगेश बंड्ये यांच्यासह अनेक कार्यकर्ते उपस्थित होते.
