खेड (रत्नागिरी):मुंबई-गोवा राष्ट्रीय महामार्गावर वाहनांच्या अनिर्बंध वेगामुळे होणाऱ्या अपघातांची मालिका सुरूच असून, लोटे एमआयडीसी परिसरात एक धक्कादायक घटना समोर आली आहे. महामार्गावरून जाणाऱ्या एका भरधाव महिंद्रा थार गाडीने रस्ता ओलांडणाऱ्या एका मध्यमवयीन महिलेला जोरदार धडक दिली. या भीषण अपघातात अंदाजे ४५ वर्षीय महिला गंभीर जखमी झाली असून, तिच्यावर उपचार सुरू आहेत. या प्रकरणी निष्काळजीपणे व अतिवेगाने गाडी चालवणाऱ्या चालकाविरोधात खेड पोलीस ठाण्यात गुन्हा दाखल करण्यात आला आहे.
नेमकी घटना काय घडली?
मिळालेल्या सविस्तर माहितीनुसार, हा अपघात ६ ऑगस्ट रोजी रात्री ९:१० वाजेच्या सुमारास लोटे एमआयडीसी परिसरातील कॉर्टेवा कंपनीसमोर घडला. कोल्हापूर जिल्ह्यातील शाहूवाडी तालुक्यातील परळेमाण येथील रहिवासी असलेला चालक आरीफ इसाक साठविलकर (वय ३७ वर्षे) हा आपली ‘महिंद्रा थार रॉक्स’ (क्रमांक: MH 09 GU 7275) घेऊन मुंबई-गोवा महामार्गावरून खेडकडून चिपळूणच्या दिशेने वेगाने जात होता.
कॉर्टेवा कंपनीजवळ गाडी आली असता, चालकाचे वाहनावरील नियंत्रण सुटले. त्याच वेळी रस्त्याच्या दुभाजकाजवळून (डिवायडर) खेडच्या दिशेने पायी चालत जाणाऱ्या एका अनोळखी महिलेला या भरधाव थारने समोरून जोरदार धडक दिली. धडक इतकी भीषण होती की, सदर महिला रस्त्यावर फेकली गेली आणि तिच्या डोक्याला व शरीराला गंभीर दुखापत झाली. या धडकेत थार गाडीच्या समोरील भागाचेही किरकोळ नुकसान झाले आहे.
चालकाविरोधात गुन्हा दाखल; जखमी महिलेचा शोध सुरू
या घटनेनंतर खेड पोलीस ठाण्याचे पोलीस हवालदार अजित संतोष कदम यांनी दिलेल्या फिर्यादीवरून २४ ऑगस्ट रोजी रात्री चालकाविरुद्ध गुन्हा नोंदवण्यात आला.
पोलिसांनी आरोपी चालक आरीफ साठविलकर याच्यावर भारतीय न्याय संहितेच्या (BNS) कलम २८१ (बेदरकारपणे वाहन चालवणे), १२५(अ), १२५(ब) (इतरांच्या जीवितास धोका निर्माण करणे) तसेच मोटार वाहन कायद्याच्या (MVA) कलम १८४ अन्वये गुन्हा दाखल केला आहे.
अपघातात गंभीर जखमी झालेल्या अंदाजे ४५ वर्षीय महिलेची अद्याप ओळख पटलेली नसून, पोलीस तिच्या नातेवाइकांचा शोध घेत आहेत. या प्रकरणाचा पुढील तपास खेड पोलीस करत आहेत.
