कोल्हापूर आणि रत्नागिरी जिल्ह्यांना जोडणाऱ्या अत्यंत महत्त्वाच्या राष्ट्रीय महामार्ग क्रमांक १६६ वरील आंबा घाटात प्रवाशांच्या सुरक्षिततेच्या दृष्टीने मोठा निर्णय घेण्यात आला आहे. गेल्या १५ दिवसांपासून सुरू असलेल्या मुसळधार पावसामुळे घाटातील रस्त्याला गंभीर स्वरूपाच्या भेगा पडल्या आहेत. रस्ता खचून दुर्घटना घडण्याची शक्यता निर्माण झाल्याने प्रशासनाने खबरदारीचा उपाय म्हणून आंबा घाटातील सर्व प्रकारची अवजड वाहतूक तात्काळ प्रभावाने बंद करण्याचे आदेश दिले आहेत.
नेमकी काय आहे परिस्थिती?
आंबा घाटात सध्या राष्ट्रीय महामार्ग प्राधिकरणाकडून (NHAI) चौपदरीकरणाचे काम सुरू आहे. हा भाग अतिवृष्टी, तीव्र उतार आणि खोल दऱ्यांमुळे भूस्खलन तसेच दरडी कोसळण्यासाठी अत्यंत संवेदनशील मानला जातो. मुसळधार पावसामुळे किलोमीटर ६९.५०० ते ६९.६०० दरम्यान रस्त्याच्या डाव्या बाजूला मोठ्या भेगा पडल्याचे निदर्शनास आले.
विशेष म्हणजे, या बाधित टप्प्याला लागूनच सुमारे १०० मीटर खोल दरी आहे. त्यामुळे मुसळधार पावसात रस्ता खचल्यास मोठी जीवितहानी होण्याचा धोका राष्ट्रीय महामार्ग प्राधिकरणाच्या तांत्रिक अहवालात वर्तवण्यात आला होता. या अहवालाची गांभीर्याने दखल घेत रत्नागिरीचे जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष मनुज जिंदल यांनी ३१ जुलैपासून पुढील आदेशापर्यंत घाटातील अवजड वाहतूक बंद ठेवण्याचे महत्त्वपूर्ण आदेश जारी केले.
हलक्या वाहनांना मुभा, पण सावधगिरी आवश्यक
घाटातून केवळ अत्यावश्यक सेवांची वाहने आणि हलकी प्रवासी वाहने (कार, दुचाकी इ.) यांनाच प्रवास करण्याची परवानगी देण्यात आली आहे. मात्र, चालकांनी नियंत्रित वेगाने आणि पूर्ण खबरदारी बाळगूनच प्रवास करावा, असे आवाहन करण्यात आले आहे.
अवजड वाहनांसाठी ‘हे’ असतील पर्यायी मार्ग
आंबा घाटातील वाहतूक कोंडी आणि अपघात टाळण्यासाठी प्रशासनाने अवजड वाहनांसाठी खालीलप्रमाणे पर्यायी मार्ग निश्चित केले आहेत:
-
मुख्य पर्यायी मार्ग: रत्नागिरी – हातखंबा – पाली – अणुस्कुरा घाट – राजापूर / कोल्हापूर
-
स्थानिक पर्याय: वाहनचालक परिस्थितीनुसार भुईबावडा घाट किंवा फोंडा घाट या मार्गांचाही वापर करू शकतात.
सुरक्षेसाठी पोलीस बंदोबस्त व कडक कारवाईचा इशारा
-
चेक पोस्ट: आंबा घाटाच्या दोन्ही प्रवेशद्वारांवर पुरेशा पोलीस बंदोबस्तासह चेक पोस्ट तैनात करण्यात आले आहेत.
-
सुरक्षा उपाय: बाधित क्षेत्रात धोक्याचे फलक, रात्रीच्या प्रवासासाठी ब्लिंकर्स आणि रिफ्लेक्टीव्ह बॅरिकेड्स लावण्याचे निर्देश सार्वजनिक बांधकाम विभाग व NHAI ला देण्यात आले आहेत.
-
कडक कारवाई: जिल्हा प्रशासनाच्या या आदेशाचे उल्लंघन करणाऱ्या वाहनचालकांवर आपत्ती व्यवस्थापन कायदा, २००५ अंतर्गत कठोर कायदेशीर कारवाई केली जाईल.
