इंदापूर तालुक्यातील खडकवासला धरणाच्या पाण्याअभावी अनेक शेतकऱ्यांची पिके जळून खाक झाली आहेत. कष्टाने वाढवलेला ऊस डोळ्यांदेखत जळताना पाहून एका हताश शेतकऱ्याने थेट कृषिमंत्री दत्तात्रय भरणे यांचे भरणेवाडी येथील निवासस्थान गाठले. पाण्याचे योग्य नियोजन न झाल्यामुळे नुकसान झालेल्या उसाचे शासकीय पंचनामे व्हावेत, अशी या शेतकऱ्याची साधी मागणी होती.
परंतु, दारात आलेल्या या बळीराजाचे गाऱ्हाणे शांतपणे ऐकून घेण्याऐवजी मंत्र्यांनी एक वेगळाच पवित्रा घेतला. शेतकऱ्याशी नीट न बोलताच ते थेट आपल्या चारचाकी वाहनात जाऊन बसले.
“तुम्ही मोठी माणसं, मी साधा माणूस!”
गाडीत बसल्यानंतर शेतकऱ्याने मंत्र्यांना त्यांच्या जुन्या आश्वासनाची आठवण करून दिली. “मामा, तुम्ही शब्द दिला होता,” असे शेतकऱ्याने म्हणताच, भरणे यांनी स्पष्ट शब्दांत नकार दिला. ते म्हणाले, “मी कोणताही शब्द दिला नव्हता. तुम्ही ज्यांच्या सांगण्यावरून आंदोलन केले, त्यांनाच आता पंचनामा करायला सांगा.”
एवढ्यावरच न थांबता त्यांनी अत्यंत उपरोधिकपणे, “तुम्ही मोठी माणसं आहात, मी साधा माणूस आहे,” असे विधान केले. पाण्यासाठी आंदोलन केले म्हणून प्रशासकीय मदत नाकारण्याचा आणि एका संकटग्रस्त शेतकऱ्याला असे उपरोधिक टोमणे मारण्याचा हा प्रकार कॅमेऱ्यात कैद झाला आहे.
हा व्हिडिओ नेमका कधीचा आहे, याची अधिकृत पुष्टी झालेली नसली, तरी अन्नदात्याशी झालेल्या या अशा वागणुकीमुळे इंदापूरसह संपूर्ण पुणे जिल्ह्यात सध्या तीव्र राजकीय आणि सामाजिक पडसाद उमटत आहेत.
