खेड (रत्नागिरी): खेड तालुक्यातून एक अत्यंत हृदयद्रावक आणि मन सुन्न करणारी बातमी समोर आली आहे. सुकवली-क्रशर परिसरात खडीची वाहतूक करणारा एक अवजड डंपर तब्बल ३० ते ३५ फूट खोल दरीत कोसळला. हा अपघात इतका भीषण होता की, यामध्ये डंपरचा अक्षरशः चक्काचूर झाला असून, तरुण डंपर चालकाचा जागीच दुर्दैवी अंत झाला आहे.
रिव्हर्स घेताना अंदाज चुकला अन घात झाला! मिळालेल्या माहितीनुसार, एमएच ०८ डब्ल्यू ८४७१ (MH 08 W 8471) या क्रमांकाचा डंपर नेहमीप्रमाणे सुकवली-क्रशर परिसरात खडी वाहतुकीचे काम करत होता. बुधवार सकाळी साडेअकराच्या सुमारास काम सुरू असताना, डंपर पाठीमागे (रिव्हर्स) घेताना चालकाचा रस्त्याच्या कडेचा अंदाज अचानक चुकला. क्षणार्धात चालकाचा वाहनावरील ताबा सुटला आणि हा अवजड डंपर थेट दरीत कोसळला.
या भीषण अपघातात डंपर चालक नितीन विजय पवार (वय २७ वर्षे, राहणार – चिंचघर-दस्तुरी) यांचा जागीच मृत्यू झाला. ऐन तरुण वयातील कमावत्या मुलाचा असा अपघाती मृत्यू झाल्याने पवार कुटुंबावर दुःखाचा डोंगर कोसळला असून संपूर्ण खेड तालुक्यात हळहळ व्यक्त होत आहे.
नरेंद्राचार्यजी संस्थानच्या रुग्णवाहिकेची तत्परता डंपर दरीत कोसळताच झालेल्या मोठ्या आवाजाने परिसरातील स्थानिक नागरिकांनी तातडीने घटनास्थळाकडे धाव घेतली. घटनेचे गांभीर्य ओळखून भरणे नाका पुलाखाली तैनात असलेल्या ‘जगद्गुरु रामानंदाचार्य श्री नरेंद्राचार्यजी संस्थान (नाणीजधाम)’ यांच्या विनामूल्य अपघात मदत सेवा देणाऱ्या रुग्णवाहिकेला पाचारण करण्यात आले.
रुग्णवाहिका चालक सुरज हंबीर यांनी स्थानिक प्रशासनाच्या मदतीने कठीण परिस्थितीत दरीत उतरून तात्काळ बचावकार्य सुरू केले. दरीतून नितीन यांचा मृतदेह बाहेर काढून पुढील प्रक्रियेसाठी कळंबणी येथील उपजिल्हा रुग्णालयात पाठवण्यात आला.
सुरक्षा रक्षक कठड्यांची स्थानिकांकडून आग्रही मागणी या दुर्दैवी घटनेनंतर स्थानिक नागरिकांमधून प्रशासनाविरोधात संताप आणि चिंता व्यक्त होत आहे. सुकवली-क्रशर परिसरातील रस्ते आणि वळणे अत्यंत धोकादायक असून तिथे पुरेशी सुरक्षा व्यवस्था नाही. भविष्यात अशा अपघातांची पुनरावृत्ती टाळण्यासाठी प्रशासनाने या ठिकाणी तातडीने मजबूत रक्षक कठडे (Safety Barriers) बसवावेत, अशी आग्रही मागणी आता ग्रामस्थांकडून केली जात आहे. पोलीस या अपघाताचा पुढील तपास करत आहेत.
