रत्नागिरी: शहरातील सतत गजबजलेल्या गवळीवाडा परिसरात मंगळवारी दुपारी अचानक घडलेल्या एका घटनेने स्थानिकांचा थरकाप उडाला. तीव्र उतारावरून खाली येत असताना एका तीनचाकी रिक्षा टेम्पोचे ब्रेक अचानक निकामी झाले. मात्र, चालकाने दाखवलेले प्रसंगावधान आणि समयसूचकतेमुळे भरवस्तीत होणारा एक मोठा आणि जीवघेणा अपघात टळला. या घटनेत टेम्पो रस्त्याच्या कडेला पलटी झाला असून चालकासह तिघेजण जखमी झाले आहेत.
नेमकी काय घडली घटना?
मंगळवारी दुपारी सुमारे साडेबारा वाजण्याच्या सुमारास हा रिक्षा टेम्पो गवळीवाड्याकडील तीव्र उतारावरून नेहमीप्रमाणे धनजी नाक्याच्या दिशेने जात होता. हा रस्ता तीव्र उताराचा असून पादचारी आणि इतर दुचाकी-चारचाकी वाहनांची येथे सतत मोठी वर्दळ असते. टेम्पो उतारावर असताना अचानक चालकाच्या लक्षात आले की वाहनाचे ब्रेक निकामी झाले आहेत.
उतारामुळे टेम्पोचा वेग वाढू लागला होता आणि वाहनावरील नियंत्रण सुटत होते. समोर इतर वाहने आणि रस्त्यावरून चालणारे नागरिक होते. परिस्थितीचे गांभीर्य ओळखून, चालकाने इतर कोणालाही धक्का लागू नये म्हणून प्रसंगावधान राखत वाहनाला एका सुरक्षित दिशेला वळवण्याचा आटोकाट प्रयत्न केला. या प्रयत्नात टेम्पोचा तोल जाऊन तो रस्त्याच्या कडेला उलटला. चालकाच्या या समयसूचक निर्णयामुळे समोर असणाऱ्या अनेक निरपराध नागरिकांचे प्राण वाचले आणि मोठा अनर्थ टळला.
स्थानिकांची तातडीची मदत व उपचार
टेम्पो पलटी होताच मोठा आवाज झाला, ज्यामुळे परिसरातील स्थानिक नागरिकांनी क्षणाचाही विलंब न लावता घटनास्थळी धाव घेतली. नागरिकांनी तातडीने मदतकार्य हाती घेत उलटलेल्या टेम्पोत अडकलेल्या चालकासह इतर दोघांना सुखरूप बाहेर काढले. तिघांनाही तातडीने उपचारासाठी रत्नागिरीच्या जिल्हा शासकीय रुग्णालयात दाखल करण्यात आले. सुदैवाने, तिघांनाही केवळ किरकोळ मुका मार लागला होता. प्राथमिक उपचारानंतर डॉक्टरांनी त्यांना घरी सोडले. अपघातात कोणतीही जीवितहानी झाली नसली तरी रिक्षा टेम्पोचे मोठे नुकसान झाले आहे.
