रत्नागिरी : शहरातील शांत आणि सुरक्षित मानल्या जाणाऱ्या उद्यमनगर परिसरात घरफोडीची एक मोठी घटना उघडकीस आली आहे. घराला कुलूप लावून बाहेर गेलेल्या कुटुंबाच्या अनुपस्थितीचा फायदा घेत अज्ञातांनी मुख्य दरवाजाचे लॉक तोडून घरातील सोन्या-चांदीचे दागिने आणि रोख रक्कम असा तब्बल १ लाख ५४ हजार ४०० रुपयांचा मुद्देमाल लांबवला आहे. या धाडसी चोरीमुळे परिसरात नागरिकांमध्ये भीतीचे वातावरण पसरले असून, पोलिसांच्या सुरक्षिततेच्या दाव्यांवर पुन्हा एकदा प्रश्नचिन्ह उपस्थित होत आहे.
नेमकी घटना कशी घडली?
पोलिसांनी दिलेल्या माहितीनुसार, उद्यमनगरमधील घरकूल हौसिंग सोसायटीत ‘तीर्थरूप’ बंगल्यात संतोष मधुकर बाष्टे (वय ६०) हे आपल्या कुटुंबासह राहतात. मंगळवारी (३ नोव्हेंबर) रात्री ९ ते बुधवारी (४ नोव्हेंबर) सकाळी ९ या १२ तासांच्या दरम्यान ही घरफोडी घडली. बाष्टे कुटुंबीय कामानिमित्त किंवा अन्य कारणास्तव घराबाहेर पडले होते, हे हेरूनच चोरांनी हा डाव साधला.
अज्ञात चोरट्यांनी बंगल्याच्या मुख्य दरवाजाचे कुलूप कुलूप उचकटून आत प्रवेश केला. त्यानंतर बेडरूममधील कपाटाचे लॉक तोडून आतील मौल्यवान ऐवजावर डल्ला मारला. चोरांनी कपाटातून २५ ग्रॅम वजनाचे १ लाख २५ हजार रुपये किमतीचे सोन्याचे मंगळसूत्र, ३ ग्रॅम वजनाची २० हजार रुपये किमतीची सोन्याची अंगठी, ५ हजार रुपये किमतीचा चांदीचा कुंकवाचा करंडा आणि ४ हजार ४०० रुपयांची रोकड असा ऐवज चोराने पळवून नेला.
पोलिसांची कसून तपासणी सुरू
बुधवारी सकाळी जेव्हा बाष्टे कुटुंब घरी परतले, तेव्हा घरातील सामानाची अस्ताव्यस्त स्थिती पाहून त्यांच्या पायाखालची जमीनच सरकली. त्यांनी तात्काळ या घटनेची माहिती रत्नागिरी ग्रामीण पोलीस ठाण्याला दिली.
माहिती मिळताच ग्रामीण पोलीस ठाण्याचे एक पथक तातडीने घटनास्थळी दाखल झाले. पोलिसांनी संपूर्ण बंगल्याची पाहणी करून फिंगरप्रिंट्स आणि इतर तांत्रिक पुराव्यांच्या आधारे पंचनामा केला. चोरट्यांचा माग काढण्यासाठी पोलिसांनी उद्यमनगर आणि परिसरातील मुख्य रस्ते, तसेच आजूबाजूच्या इमारतींवरील सीसीटीव्ही फुटेज तपासण्याचे मोठे सत्र सुरू केले आहे. तसेच, स्थानिक गुन्हे शाखा (LCB) देखील या प्रकरणी समांतर तपास करत असून, संशयित चोरांच्या लवकरात लवकर मुसक्या आवळल्या जातील, असा विश्वास पोलिसांनी व्यक्त केला आहे.
