रत्नागिरी: कोकण रेल्वेने प्रवास करणाऱ्या लाखो प्रवाशांसाठी एक अत्यंत दिलासादायक आणि महत्त्वाची बातमी आहे. गणपती उत्सव असो, उन्हाळ्याची सुट्टी की रोजची धावपळ, कोकण रेल्वेच्या गाड्या नेहमीच प्रवाशांनी हाऊसफुल्ल असतात. अशा वेळी प्रवाशांची सुरक्षा आणि रेल्वे स्थानकांवरील कायदा-सुव्यवस्था राखणे हे पोलिसांसाठी मोठे आव्हान असते. हेच आव्हान पेलण्यासाठी आता राज्य शासनाने एक मोठा आणि महत्त्वपूर्ण निर्णय घेतला आहे. रत्नागिरी लोहमार्ग पोलीस ठाण्याची सुरक्षा व्यवस्था आणखी मजबूत करण्यासाठी तब्बल १०० अतिरिक्त सुरक्षारक्षक तैनात केले जाणार आहेत.
महाराष्ट्र राज्य सुरक्षा महामंडळाकडून (MSF) हे जवान उपलब्ध करून दिले जाणार असून, गृह विभागाने यासंबंधीचा अधिकृत शासन निर्णय (GR) जारी केला आहे.
रोहा ते राजापूर रोड: ३७ स्थानकांवरील ताण होणार कमी
रत्नागिरी लोहमार्ग पोलीस ठाण्याचे कार्यक्षेत्र खूप मोठे आहे. यामध्ये रायगड जिल्ह्यातील रोहापासून ते थेट रत्नागिरीच्या राजापूर रोड दरम्यान असणाऱ्या एकूण ३७ रेल्वे स्थानकांचा समावेश होतो. सध्या या मार्गावरून रोज तब्बल ७० प्रवासी रेल्वे गाड्या आणि ४० मालगाड्या धावतात. दिवसेंदिवस वाढणारी प्रवाशांची गर्दी आणि गाड्यांची संख्या यामुळे उपलब्ध असलेल्या पोलीस कर्मचाऱ्यांवर प्रचंड ताण येत होता. मनुष्यबळ अपुरे पडत असल्याने मुंबईच्या पोलीस आयुक्तांनी शासनाकडे अतिरिक्त सुरक्षारक्षकांची मागणी केली होती. त्याला आता मंजुरी मिळाली आहे.
दोन वर्षांसाठी कंत्राटी तत्त्वावर नियुक्ती
नवीन पोलीस भरती होऊन पोलीस अंमलदार प्रत्यक्ष सेवेत येईपर्यंत प्रवाशांच्या सुरक्षेत कोणतीही कसर राहू नये, म्हणून ही तात्पुरती पण अत्यंत प्रभावी व्यवस्था करण्यात आली आहे. १२ जून २०२६ पासून पुढील दोन वर्षांच्या कालावधीसाठी कंत्राटी तत्त्वावर या एमएसएफ (MSF) जवानांची नियुक्ती करण्यात आली आहे. हे सुरक्षारक्षक आता रेल्वे गाड्यांमध्ये आणि स्थानकांवर लोहमार्ग पोलिसांच्या खांद्याला खांदा लावून चोख बंदोबस्त ठेवणार आहेत.
चोऱ्या आणि अनुचित प्रकारांना बसेल आळा
या अतिरिक्त सुरक्षारक्षकांमुळे प्रवासादरम्यान होणाऱ्या चोऱ्या, गर्दीच्या वेळी होणारी पाकीटमारी, महिला प्रवाशांची सुरक्षा आणि स्थानकांवरील अनुचित प्रकारांना चाप बसणार आहे. ऐन गर्दीच्या हंगामात रेल्वे गाड्यांमध्ये होणारी प्रवाशांची गर्दी नियंत्रित करणे यामुळे अधिक सोपे होणार असून कोकण रेल्वेचा प्रवास आता अधिक सुरक्षित, सुकर आणि निर्धास्त होणार आहे.
