“२५ खोके एकदम ओके”; आर्थिक देवाणघेवाणीचा गंभीर आरोप!
या संपूर्ण प्रकरणावर आपली रोखठोक आणि अत्यंत तीव्र प्रतिक्रिया व्यक्त करताना बिपीन बंदरकर यांनी थेट ‘२५ खोक्यां’चा उल्लेख केला आहे. त्यांनी आरोप केला की, “उमेदवारी मागे घेण्यासाठी नक्की कुठे पैसे घेतले गेले आणि ते कसे ट्रान्सफर झाले, या सर्वाचा संपूर्ण कच्चाचिठ्ठा (तपशील) माझ्याकडे तयार आहे. या मोठ्या आर्थिक व्यवहाराचा मी लवकरच जाहीर खुलासा करणार आहे.” बंदरकर यांच्या या दाव्यामुळे आता या निवडणुकीला एक वेगळंच आणि संशयास्पद वळण मिळालं आहे.
“बाळ माने हेच खरे गद्दार”; भूतकाळातील दाखले देत जोरदार टीका
बंदरकर यांनी केवळ आर्थिक गैरव्यवहाराचाच आरोप केला नाही, तर बाळ माने यांच्या राजकीय निष्ठेवरही तीव्र शब्दांत प्रहार केला. ते म्हणाले, “रत्नागिरीतील खरा गद्दार कोण आहे, हे आता बाळ माने यांनी स्वतः आपल्या कृतीतून जनतेसमोर सिद्ध केलं आहे.”
यावेळी त्यांनी बाळ माने यांच्या भूतकाळातील राजकीय प्रवासाचा दाखला दिला. माने हे पूर्वी भारतीय जनता पक्षात (भाजप) होते. त्याचा संदर्भ देत बंदरकर पुढे म्हणाले, “भाजपमध्ये असताना त्या पक्षाने त्यांना भरभरून दिलं, सर्व काही दिलं, तरीही त्यांनी भाजपशी गद्दारी केली. त्यानंतर आता शिवसेना उद्धव बाळासाहेब ठाकरे पक्षाने त्यांच्यावर विश्वास ठेवून, अत्यंत सन्मानाने त्यांना उमेदवारी दिली होती. पण माने यांनी या पक्षाशी आणि इथल्या कार्यकर्त्यांशीही गद्दारी केली.”
ऐन निवडणुकीच्या रंगात उमेदवारानेच माघार घेतल्यामुळे आणि त्यानंतर पक्षाच्याच शहर प्रमुखांनी केलेल्या या गंभीर आरोपांमुळे कोकण विधान परिषद निवडणुकीतील राजकीय संघर्ष आता टोकाला पोहोचला आहे. येत्या काळात हा ‘२५ खोक्यांचा’ वाद कोणतं नवीन वादळ निर्माण करतो, याकडे सर्वांचे लक्ष लागले आहे.
