मुंबई आणि गोवा दरम्यान धावणारी ‘तेजस एक्स्प्रेस’ आता प्रवाशांसाठी डोकेदुखी ठरू लागली आहे. कधीकाळी वेगासाठी आणि उत्तम सेवेसाठी ओळखली जाणारी ही प्रीमियम ट्रेन गेल्या काही महिन्यांपासून कमालीची रेंगाळत चालली आहे. प्रवाशांचा वेळ वाचावा म्हणून सुरू झालेली ही गाडी आता अक्षरशः ७ ते ८ तास उशिराने धावत असल्याच्या तक्रारी समोर येत आहेत. माहितीच्या अधिकारातून (RTI) मिळालेली आकडेवारी तर प्रवाशांच्या या त्रासावर थेट शिक्कामोर्तब करते.
RTI च्या माहितीनुसार, १ नोव्हेंबर २०२५ ते १८ मे २०२६ या काळात मुंबई (CSMT) ते मडगाव दरम्यान धावणाऱ्या तेजस एक्स्प्रेसच्या (गाडी क्र. २२११९) एकूण १४२ फेऱ्या झाल्या. यापैकी तब्बल ७८ फेऱ्या विलंबाने धावल्या, तर केवळ ६४ फेऱ्या वेळेवर पूर्ण होऊ शकल्या. म्हणजेच या गाडीचा वक्तशीरपणा अवघा ४५.०७ टक्के एवढाच राहिला.
परतीचा प्रवास, म्हणजेच मडगाव ते मुंबई (गाडी क्र. २२१२०) तेजस एक्स्प्रेसची परिस्थिती तर याहूनही बिकट आहे. या मार्गावरील १४२ फेऱ्यांपैकी तब्बल ११३ वेळा ही गाडी लेट झाली. केवळ २९ फेऱ्यांमध्ये ती वेळेवर पोहोचू शकली, ज्यामुळे तिचा वक्तशीरपणाचा टक्का केवळ २०.४२ टक्क्यांवर घसरला आहे.
केवळ तेजस एक्स्प्रेसच नाही, तर कोकण रेल्वे मार्गावरील इतर महत्त्वाच्या गाड्यांची अवस्थाही अशीच आहे:
-
एलटीटी ते मडगाव एसी एक्स्प्रेस (२२११५): वक्तशीरपणा फक्त ४०%
-
मडगाव ते एलटीटी एसी एक्स्प्रेस (२२११६): वक्तशीरपणा फक्त २५%
-
मंगळुरू ते सीएसएमटी एक्स्प्रेस (१२१३४): वक्तशीरपणा फक्त ३२.४८%
प्रवाशांचा वाढता संताप आणि वंदे भारतचा प्रभाव तेजस एक्स्प्रेस ही कमाल २०० किमी/तास वेगाने धावण्यासाठी डिझाइन केलेली एक हाय-स्पीड ट्रेन आहे. आरामदायी आसनव्यवस्था आणि आधुनिक सुविधांमुळे या गाडीला प्रवाशांची मोठी पसंती होती. मात्र, जून २०२३ मध्ये या मार्गावर ‘वंदे भारत एक्स्प्रेस’ सुरू झाल्यापासून तेजसकडे दुर्लक्ष होत असल्याचा प्रवाशांचा आरोप आहे. तांत्रिक बिघाड, सेवेचा घसरलेला दर्जा आणि सततचा विलंब यामुळे हैराण झालेले प्रवासी आता महागडे तिकीट असूनही तेजस ऐवजी वंदे भारतला प्राधान्य देत आहेत.
विशेषतः सुट्ट्यांच्या आणि पर्यटनाच्या हंगामात रेल्वेच्या या सावळागोंधळामुळे प्रवाशांचे संपूर्ण नियोजन कोलमडत असून, कोकण रेल्वे आणि मध्य रेल्वे प्रशासनाने यावर तातडीने तोडगा काढावा, अशी मागणी आता जोर धरू लागली आहे.
