राजापूर: कोकणचा पाऊस म्हटला की अंगावर रोमांच उभे राहतात. पण याच मुसळधार पावसात जर तुम्हाला एसटी बसच्या आतमध्येही छत्री धरून प्रवास करावा लागला तर? ऐकायला थोडे अजब वाटेल, पण सध्या रत्नागिरी जिल्ह्यातील राजापूर तालुक्यात हेच कटू वास्तव प्रवाशांच्या वाट्याला आले आहे. ग्रामीण भागाची हक्काची जीवनवाहिनी समजली जाणारी आपली ‘लालपरी’ सध्या योग्य देखभालीअभावी पुरती दुरवस्थेत पोहचली आहे. राजापूर आगारातील अनेक गाड्या गळत असल्यामुळे प्रवाशांना मुसळधार पावसात अक्षरशः कसरत करत प्रवास करावा लागत आहे.
बसच्या आतही पाऊस! झर्ये-राजापूर मार्गावरील धक्कादायक चित्र सध्या राजापूर तालुक्यात पावसाने जोरदार बॅटिंग सुरू केली आहे. अशातच राजापूर आगारातील ‘MH 14 BT 2440’ या क्रमांकाची बस जेव्हा झर्ये-राजापूर मार्गावरून धावत होती, तेव्हा प्रवाशांना एका विचित्र आणि त्रासदायक अनुभवाला सामोरे जावे लागले. बाहेर तर धो-धो पाऊस पडत होताच, पण बसच्या छतातूनही पाण्याचे पाट वाहत होते!
बसच्या छताला पडलेल्या भगदाडांमुळे आतल्या सीटवर पाणी साचले होते. त्यामुळे स्वतःचे कपडे आणि सामान वाचवण्यासाठी प्रवासी गाडीतच इकडून तिकडे धावपळ करत होते. कोणी कोरडी जागा शोधत होते, तर कोणी थेट बसच्या आतच छत्र्या उघडून बसले होते. शाळकरी मुले, नोकरदार आणि वयस्कर आजोबा-आजींना या गळक्या गाडीमुळे जो मनस्ताप सहन करावा लागला, तो खरोखरच संतापजनक होता.
देखभालीचा प्रश्न ऐरणीवर; आगार प्रशासन कधी जागे होणार? कोकणात दरवर्षी विक्रमी पाऊस पडतो, हे काही नवीन नाही. अशा परिस्थितीत पावसाळा सुरू होण्यापूर्वीच सर्व बसेसची दुरुस्ती आणि वॉटरप्रूफिंग करणे आगार प्रशासनाचे कर्तव्य असते. मात्र, राजापूर तालुक्यातील अंतर्गत आणि ग्रामीण मार्गांवर चालणाऱ्या बहुतांश गाड्या जुन्या आणि जीर्ण झाल्या आहेत.
प्रवाशांनी संताप व्यक्त करताना म्हटले आहे की, “आम्ही नियमित तिकीट काढून प्रवास करतो, मग आम्हाला अशा नरकयातना का? सुरक्षित प्रवासाची हमी देणारी लालपरी स्वतःच आज आजारी पडली आहे.” या गंभीर समस्येकडे राजापूर आगार प्रशासनाने तातडीने लक्ष देऊन या गळक्या बसेसची दुरुस्ती करावी किंवा नवीन बसेस उपलब्ध करून द्याव्यात, अशी तीव्र मागणी आता जनतेमधून होत आहे.
