रत्नागिरी: रत्नागिरी तालुक्यातील निळवळी ते जयगड मार्गावर भरधाव वेगात जाणाऱ्या एका बल्कर ट्रकचा अपघात झाल्याची घटना समोर आली आहे. चालकाचा वाहनावरील ताबा सुटल्याने हा ट्रक थेट रस्त्याच्या विरुद्ध दिशेला जाऊन साईडपट्टीवरून खाली उतरला. सुदैवाने या घटनेत कोणतीही जीवितहानी झाली नसली, तरी चालकाच्या निष्काळजीपणामुळे हा अपघात घडल्याने जयगड पोलीस ठाण्यात गुन्हा दाखल करण्यात आला आहे.
नेमकी घटना काय घडली?
मिळालेल्या माहितीनुसार, ३० ऑगस्ट रोजी दुपारी साधारण १२:३० वाजण्याच्या सुमारास संशयित चालक राजू भाऊराव फड (वय ३७ वर्षे, रा. कीर्तीपूर उसवाड, ता. मंठा, जि. जालना) हा आपल्या ताब्यातील बल्कर ट्रक (क्रमांक MH 46 BU 7101) घेऊन निळवळीहून जयगडच्या दिशेने जात होता.
हा ट्रक मौजे कळझोंडी परिसरातील फाटा क्रमांक २ जवळील एका धोकादायक वळणावर आला असता, चालकाने रस्त्याच्या परिस्थितीचा अंदाज न घेता वाहन अत्यंत हलगर्जीपणे चालवले. अचानक वाहनावरील नियंत्रण सुटल्याने ट्रक रस्त्याच्या उजव्या बाजूला विरुद्ध दिशेला गेला आणि पुढील दोन्ही चाके रस्त्याच्या साईडपट्टीवरून खाली घसरली.
मोठा अनर्थ टळला; पोलिसांत गुन्हा नोंद
दुपारच्या वेळी या मार्गावर इतर वाहनांची वर्दळ कमी असल्याने मोठी दुर्घटना टळली. मात्र, प्रवाशांच्या व स्वतःच्या जिवाची पर्वा न करता वाहन चालवल्याप्रकरणी पोलिसांनी संबंधित चालकाविरुद्ध निष्काळजीपणाचा गुन्हा नोंदवला आहे. या प्रकरणाचा अधिक तपास जयगड पोलीस करत आहेत.
