नवी मुंबईतील अक्षता म्हात्रे हिच्यावर अत्याचार करून तिची हत्या घडल्याची घटना ताजी असतानाच उरणमध्ये एका २२ वर्षीय तरूणीची क्रूर हत्या करण्यात आली आहे. आरोपीने तरूणीवर सपासप वार करून तीचा खून केला, आणि भररस्त्यात तीचा मृतदेह टाकून दिला. हे वार इतके भयानक होते की, सुरूवातीला तरूणीची ओळखच पटली नाही. या घटनेनंतर उरणसह रायगडात तीव्र संताप उसळला. नागरिक, विविध संघटनांचे, राजकिय पक्षांच्या प्रतिनिधींनी रुग्णालयात धाव घेत एकच संताप व्यक केला. या घटनेनंतर शहरातील व्यापाऱ्यांनी दुकाने बंद ठेवून निषेध व्यक्त करण्यात आला. उरण शहरात राहणारी यशश्री सुरेंद्र शिंदे ही गुरुवार दि. २५ जुलै रोजी सकाळी घरातून निघाली ती दुपारी दिडच्या सुमारास उरण बाझारपेठ येथे आढळून आली. मात्र त्यानंतर ती कुठेही दिसली नाही.
तरूणी बेपत्ता – मुलगी घरी न आल्याने तीच्या नातेवाईकांनी तीचा शोध घेतला. मात्र ती कुठेही आढळून आली नाही. त्यानंतर मुलगी हरवली किंवा बेपत्ता झाल्याचे लक्षात येताच तीच्या कुटुंबियांनी यशश्री शिंदे हरविले असल्याची तक्रार उरण पोलीस ठाण्यात नोंदविली. तीचा शोध सुरु होता मात्र ती कुठेही सापडली नाही.
मृतदेह आढळला – शुक्रवार दि. २६ जुलै रोजी रात्री उरण तालुक्यातील कोटनाका येथील पेट्रोलपंप येथे एका तरुणीचे मृतावस्थेत शरीर आढळले होते. या मृत व्यक्तीला इंदिरा गांधी ग्रामीण शासकीय रुग्णालय उरण येथे नेण्यात आले. मृत शरीराची ओळख नातेवाईकांना पटली. मृत शरीर बेपत्ता झालेल्या यशश्री शिंदे हिचेच असल्याची तपासातून निष्पन्न झाले.
शवविच्छेदनात सत्य समोर – पोस्मार्टम झाल्यानंतर तींच्या शरीरावर विविध वार करून तिला जखमी करून तिची क्रूरतेने हत्त्या केल्याची बाब पोस्मार्टममधून समोर आली आहे. ही घटना समजताच शनिवार दि. २७ जुलै रोजी सकाळी ८ वाजल्यापासून सर्वच राजकीय पक्षाचे पदाधिकारी कार्यकर्ते, विविध सामाजिक संस्था संघटनेचे प्रतिनिधी सदस्य, विविध हिंदुत्ववादी संघटनेचे पदाधिकारी सदस्य, जागरूक नागरिकांनी इंदिरा गांधी ग्रामीण शासकीय रुग्णालयमध्ये धाव घेतली.
यशश्रीचा खून – घडलेल्या घटनेचा सर्वांनीच जाहीर निषेध केला. यशश्री शिंदे हिच्या शरीरावर विविध ठिकाणी वार करण्यात आलेले आहेत. तीच्या शरीरावर इतके वार करण्यात आले आहेत की तीच्या शरीराची ओळख पटणेसुद्धा अवघड झाले होते. ही घटना प्रेम प्रकरणातून घडली असल्याची प्राथमिक बाब समोर आली आहे. यशश्री शिंदे हिचा खून कोणी केला? यशश्री शिंदे हिचा खून कशासाठी करण्यात आला? या सर्व प्रकरणाची सखोल चौकशी उरण पोलीस ठाण्याचे वरिष्ठ पोलीस निरीक्षक राजेंद्र पाटील व त्यांचे सहकारी करीत आहेत.
नागरिक संतप्त – उरणमध्ये लव्ह जिहादची अनेक प्रकरणे समोर येत असून या प्रकरणात पोलीस प्रशासनाने त्वरित अॅक्शन घेऊन कडक कारवाई करावी, अशी मागणी जनतेने केली आहे. यशश्री शिंदेच्या बाबतीत घडलेली घटना अंत्यत निर्दयी, क्रूर व निंदनीय असल्याने मानव जातीला काळिमा फासणारी घटना असल्याने दोषी व्यक्तीला, आरोपीला त्वरित फाशी व्हावी, अशी मागणी यशश्रीच्या कुटुंबियांनी, व संतप्त झालेल्या नागरिकांनी केली आहे.
नेत्यांची हजेरी – घटनास्थळी विद्यमान आमदार तथा भाजप नेते महेश बालदी, शिवसेना रायगड जिल्हा प्रमुख तथा माजी आमदार मनोहरशेठ भोईर, राष्ट्रवादीच्या नेत्या भावना घाणेकर, गणेश नलावडे, शिंदे गटाचे रमेश म्हात्रे, शेतकरी कामगार पक्षाचे नेते महादेव बंडा, तालुकाध्यक्ष सीमा घरत, भारतीय जनता पार्टीचे रवीशेठ भोईर, कौशिक शहा, माजी नगराध्यक्ष सायली म्हात्रे, जनवादी महिला संघटनेचे हेमलता पाटील, जेएनपीएचे विश्वस्त कॉम्रेड भूषण पाटील, कामगार नेते संतोष घरत, उरण सामाजिक संस्थेचे सरचिटणीस संतोष पवार तसेच विविध शिवप्रेमी संघटना, संस्था, हिंदुत्ववादी संघटनेचे पदाधिकारी सदस्य, जागरूक नागरिक मोठ्या प्रमाणात उपस्थित होते.
तपास सुरू – आरोपीचा शोध सुरु असून त्या अनुषंगाने तपास सुरु आहे. दोषी व्यक्तीवर कठोरात कठोर कारवाई करण्यात येईल. यशश्री शिंदे हिच्या कुटुंबियांना न्याय मिळवून देऊ असे आश्वासन उरण पोलीस ठाण्याचे वरिष्ठ पोलीस निरीक्षक राजेंद्र पाटील यांनी दिले.
दुकाने बंद – या निंदनीय कृत्याचे व्हाट्सअप, फेसबुक, इंस्टाग्राम, ट्विटर आदी सोशल मीडियावर पडसाद उमटले असून सोशल मीडियावर नागरिकांनी मोठ्या प्रमाणात निषेध व्यक्त केला आहे. तर उरणमधील व्यापारांनी आपली दुकाने बंद ठेवून निषेध व्यक्त केला आहे.
